Кумитаи кор бо занон ва оилаи назди Ҳукумати Ҷумҳурии Тоҷикистон ҳисоботи нимсолаи аввали соли 2025 –ро нашр кард, ки дар он масъалаи ҳимояи оила, дастгирии занон ва пешгирии зӯроварӣ инъикос шудааст.

Бунафша Файзиддинзода, раиси Кумита гуфт, ки шумораи талоқ нисбат ба ҳамин давраи соли гузашта кам шуда, вале шикоятҳо нисбат ба зӯроварӣ дар оила афзоиш ёфтааст.

Бар асоси ҳисоботи Кумита аз моҳи январ то июн беш аз 206 ҳазор чорабинӣ доир гардидааст, аз ҷумла 430 ҳазор суҳбати фардӣ бо оилаҳо, 3847 аксия дар маҳалҳо ва 975 чорабинӣ дар мактабҳо.

Шумораи муроҷиаткунандагон оид ба зӯроварӣ дар оила аз 1844 дар соли 2024 ба 2121 дар соли 2025 расид. Аз ин шумора 1763 шикоят нисбат ба мардон ва 251 нисбат ба занон рост меояд.

Ҳамзамон, шумораи талоқҳо аз 4408 ҳолат дар соли гузашта ба 4117 ҳолат кам шудааст. Шумораи кӯдакони зарардида аз ҷудошавии волидайн низ бо 402 ҳолат камтар шудааст.

Омили дигари нигаронкунанда афзоиши хӯдкӯшӣ дар миёни духтарони ноболиғ аст. Шумораи духтарони ноболиғе, ки даст ба худкӯшӣ мезананд, аз 24 то 30 ҳолат афзоиш ёфтааст.

Дар доираи барномаҳои дастгирии соҳибкории бонувон бо дастгирии Президенти Тоҷикистон дар соли 2024 120 лоиҳа ба маблағи 5 миллион сомонӣ ва дар соли 2025 200 лоиҳа ба маблағи 15 миллион сомонӣ амалӣ гардидааст.

Кумита дар 6 моҳи ахир 843 рейд барои мубориза бо хуруфот, ифротгароӣ ва ҷудошавӣ 1345 семинари омӯзишӣ, 1195 озмун ва аксия, 114 фестивал ва 263 мизи гирд ташкил намудааст.

Ҳамчунин, дар пойтахт аз моҳи март то май маъракаҳои фарҳангии “Мо либоси тоҷикӣ мепӯшем” ва “Зан-рақами покӣ” доир гардиданд.

Бо вуҷуди ин, дастовардҳо, беш аз 29 ҳазор зан расман бекор сабт шудаанд.

Кумитаи мазкур таъкид намудааст, ки кори фаъолонаи худро дар самти ҳалли мушкилоти иҷтимоӣ ва густариши барномаҳои дастгирии занон идома хоҳад дод.

Dialog.tj