Томми Пиготт, муовини сухангӯи Вазорати корҳои хориҷии Иёлоти Муттаҳидаи Амрико дар посух ба изҳороти Сайид Аббос Ироқчӣ, вазири корҳои хориҷии Эрон гуфт, ки Вашингтон барои музокира омода аст, вале тӯб дар майдони Эрон қарор дорад.

Тибқи гузориши расонаҳо Томми Пиготт рӯзи панҷшанбе дар як нишасти матбуотӣ дар шаҳри Вашингтон гуфт: “Мехоҳам таъкид кунам, ки Иёлоти Муттаҳида барои музокира бо Эрон омодааст. Эрон имкони кӯтоҳ дорад, аммо ҳоло тӯб дар майдони Эрон аст. Мо интизор мемонем, ки онҳо чӣ тасмим мегиранд”.

Ин суханон дар посух ба мусоҳибаи ахири Ироқчӣ садо дод, ки дар он дипломати аршади эронӣ гуфта буд: “Иёлоти Муттаҳида бояд пеш аз оғози ҳар гуна музокироти атомӣ масъулияти ҳамлаҳои ахир ба марказҳои атомии Эронро бар дӯш гирад ва ҷубронпулӣ пардохт кунад”.

Дипломати амрикоӣ Томми Пиготт дархости Теҳронро “масхаромез” хонда, афзуд, ки “Ҳар гуна дархости ҷуброни молиявӣ аз Иёлоти Муттаҳида аз ҷониби давлати Эрон масхаромез аст. Агар Эрон воқеан мехост захира кунад ва таҳримҳоро коҳиш диҳад, бояд рафтори бесуботкунандаро бас мекард ва аз пешбурди барномаи атомӣ даст мекашид”.

Изҳороти ҷониби амрикоӣ дар ҳоле садо медиҳад, ки музокироти эҳтимолӣ дар бораи эҳёи созишномаи атомии соли 2015 (Барномаи ҷомеаи иқдоми муштарак) то ҳол ба номуайянӣ рӯ ба рӯ аст. Эрон таъкид дорад, ки эҳёи созиш бояд бо бардошта шудани таҳримҳо ва таъмини кафолатҳои ҳуқуқӣ ҳамроҳ бошад.

Вашингтон дар гузашта низ гуфта буд, ки роҳи дипломатӣ барои Эрон боз аст, вале амалҳои Теҳрон дар минтақа ва густариши Барномаи атомӣ монеаи ҷиддӣ барои рушди музокирот шудааст.

Dialog.tj