Дар шаҳри Душанбе мулоқоти ҳайати роҳбарияти Агентии назорати давлатии молиявӣ ва мубориза бо коррупсияи Ҷумҳурии Тоҷикистон бо намояндагони Агентии муқовимат бар зидди коррупсия ва Департаменти мубориза бо ҷиноятҳои иқтисодии назди Прокуратураи генералии Ҷумҳурии Ӯзбекистон доир гардид.

Ин мулоқот дар доираи татбиқи нақша-чорабиниҳо ҷиҳати амалисозии Созишномаи ҳамкорӣ барои солҳои 2025-2026 ва Ёддошти тафоҳум барои солҳои 2024-2025 сурат гирифт, ки қаблан миёни ду ниҳод ба имзо расида буд.

Бар асоси иттилоъ дар ҷараёни мулоқот зикр шуд, ки сатҳи баланди ҳамкориҳои стратегии миёни Тоҷикистон ва Ӯзбекистон заминаи мусоид барои тақвияти муборизаи муштарак бо коррупсия ва ҷиноятҳои иқтисодии фаромиллӣ фароҳам кардааст.

Ҷонибҳо омодагии худро ҷиҳати таҳкими робитаҳои дуҷониба дар асоси санадҳои амалкунандаи ҳамкорӣ ва мубодилаи таҷриба дар бахши зиддикоррупсионӣ зикр карданд.

Ҳамчунин, дар доираи сафари ҳайати Ӯзбекистон ба Тоҷикистон баргузор кардани семинари омӯзишӣ ба нақша гирифта шудааст. Ин чорабинӣ ба шиносоии меҳмонони ботаҷриба ва дастовардҳои Тоҷикистон дар самти сиёсати зиддикоррупсионӣ равона шудааст.

Dialog.tj