Рӯзи 29-уми июл роҳбарияти муассисаи давлатии “Тоҷикфилм” бо намояндагони студияи синамои “Спектр”-и Федератсияи Русия дар шаҳри Душанбе мулоқот анҷом доданд. Ҷонибҳо омодагии худро барои ҳамкорӣ дар наворбардории филми нави русӣ таҳти унвони “Мубориза барои зиндагӣ”-ро таъйид карданд.

Бар асоси иттилои “Тоҷикфилм” дар мулоқот Маҳмадсаид Шоҳиён, директори муассиса бо Владимир Пирожок, продюсери генералии лоиҳа, Алексей Митс, Румӣ Шоазимов, Алексей Мячиков ва Александр Соловёв, наворбардор гуфтагӯ намуданд.

Ҳарду ҷониб таъкид намуданд, ки интихоби манзараҳои табиӣ ва лаҳзаҳои асосии филм дар шаҳри Душанбе ва гирду атрофи он сурат хоҳад гирифт. Ба гуфтаи онҳо, ин ҷойҳо метавонанд ба сифат ва таъсиргузории филм саҳми муассир гузоранд.

Дар ҷараёни сафари эҷодии ҳайати рус, ҳамчунин, мулоқотҳо бо кормандон ва мутахассисони “Тоҷикфилм”, роҳбарони студияҳои маҳаллӣ ва ҳунарпешагони тоҷик дар назар аст.

Мақомоти тоҷик ин ҳамкориро як қадами муҳимми рушди ҳамкориҳои синамоии Тоҷикистон ва Русия арзёбӣ мекунанд ва мегӯянд, ки наворбардории филм ба таври комил дар қаламрави Тоҷикистон анҷом хоҳад ёфт.

Филми “Мубориза барои зиндагӣ” яке аз лоиҳаҳои нави муштараки синамогарони русу тоҷик шумурда мешавад, ки метавонад синамои миллиро дар арсаи байналмилалӣ муаррифӣ кунад.

Dialog.tj