Дар нишасти хабарӣ муовини директори генералии Ҷамъияти саҳомии кушодаи “Барқи тоҷик” Абдулло Қурбонзода иттилоъ дод, ки давоми шашмоҳаи соли равон дар неругоҳҳои барқи обӣ ва марказҳои барқу гармидиҳии “Барқи тоҷик” ҳаҷми истеҳсоли неруи барқ дар маҷмуъ беш аз 8,9 миллиард кВт-соатро ташкил намудааст.

Манбаъ афзуд, ки истеҳсоли неруи барқ дар неругоҳҳои барқи обӣ беш аз 8,3 миллиард кВт-соат ва дар марказҳои барқу гармидиҳӣ 858,9 миллион кВт-соат таъмин карда гардид, ки ин нишондод нисбат ба ҳамин давраи соли гузашта 944,6 миллион кВт-соат зиёд аст.

Ҳамчунин, зикр гардид, ки дар давраи ҳисоботӣ талафоти неруи барқ дар неругоҳҳои барқи обӣ ва марказҳои барқу гармидиҳии ҷамъият дар маҷмуъ 34,3 миллион кВт-соат ё ин ки 0,39 фоизи барқи истеҳсолшударо ташкил дод. Ин нишондиҳанда нисбат ба ҳамин давраи соли гузашта 1 миллион кВт-соат ё 0,05 фоиз коҳиш ёфтааст.

Дар нишасти хабарии “Барқи Тоҷик” маълумот дода шуд, ки дар ин давра ҳаҷми истеҳсоли неруи гармӣ дар мамлакат ба 812,6 ҳазор Гкал баробар шуд, ки нисбат ба ҳамин давраи соли 2024 дар ҳаҷми 29,7 ҳазор Гкал зиёд гардидааст.

Ҳамзамон, масъулини Шабакаҳои тақсимоти барқ сабаби қатъи нерӯи барқ дар фасли тобистонро дар гармии аз меъёр зиёд иброз доштанд. Илова бар ин, омили дигареро низ гуфтанд, ки ба роҳандозии 4 лоиҳа дар кишвар рабт дорад ва барои иҷрои корҳои он интиқоли нерӯи барқ қатъ мешавад: бобарқтаъминкунии деҳот бо 6,5 млн доллар, барномаи рушди соҳаи энергетика бо 95 млн доллар, CASA-1000 бо 15 млн доллар ва кам кардани талафоти нерӯи барқ дар вилояти Хатлон.

Dialog.tj