Дар шаш моҳи аввали соли 2025 дар Тоҷикистон 33 ҳазору 802 нафар расман ҳамчун бекор сабт шудаанд. Дар баробари ин, шумораи умумии шахсони корҷӯ ба 62 ҳазору 399 нафар расидааст.

Дар ин бора Солеҳа Холмаҳмадзода, Вазири меҳнат, муҳоҷират ва шуғли аҳолии кишвар рӯзи 30-уми июл дар ҷараёни нишасти матбуотӣ хабар дод. Ба гуфтаи вазир, рақамҳои пешниҳодшуда фақат шумораи шаҳрвандонеро дар бар мегиранд, ки ба таври расмӣ дар Агентии меҳнат ва шуғли аҳолӣ худро сабт кардаанд. Вале эҳтимол меравад, ки теъдоди воқеии бекорон дар кишвар аз ин бештар бошад.

Солеҳа Холмаҳмадзода таъкид намуд, теъдоди умумии шахсоне, ки феълан дар бахшҳои мухталифи иқтисодиёт фаъолият доранд, 2 миллиону 748 ҳазору 700 нафарро ташкил медиҳанд.

Қаблан, бар асоси иттилои Агентии омори Тоҷикистон, то охири соли 2024 дар кишвар 51 ҳазору 400 нафар бекор ба қайд гирифта шуда буданд, ки 1,9 фоизи неруи кориро ташкил медод. Ин нишондод нисбат ба моҳи декабри соли 2023 6,3 фоиз бештар будааст.

Солеҳа Холмаҳмадзода дар идомаи нишасти матбуотӣ гуфт, ки дар се моҳи аввали соли 2025 дар кишвар 42 ҳазору 812 ҷойи корӣ, аз ҷумла доимӣ, муваққатӣ ва мавсимӣ, таъсис дода шудааст.

Тибқи иттилои Вазорат, 23 ҳазору 766 ҷойи корӣ ба бахши воқеии иқтисодиёт ва 19 ҳазору 46 ҷой дигар ба бахши хизматрасонӣ тааллуқ доранд. Бо вуҷуди талошҳои давлат барои ташкили ҷойҳои корӣ Тоҷикистон ҳанӯз ҳам бо мушкили бекории расмӣ ва норасоии ҷойи кор барои ҷавонон ва муҳоҷирони бозгашта аз муҳоҷират рӯ ба рӯ мебошад.

Dialog.tj