Дирӯз ба муносибати чилумин рӯзи шаҳидони ҷанги таҳмилии 12-рӯзаи режими Исроил бар зидди миллати Эрон маросими бузургдошти онҳо, бо ҳузури роҳбари Эрон Оятуллоҳ Хоманаӣ доир гардид. Дар ин маросим оилаи шаҳидон, намояндагони табақаҳои мухталифи мардум ва ҷамъе аз масъулони давлатӣ ширкат намуданд.

Оятуллоҳ Хоманаӣ дар суханронии худ ҷанги ахирро нишонаи ирода ва тавоноии Ҷумҳурии Исломии Эрон донист ва таъкид кард, ки душманон асосан бо имон, дониш ва ваҳдати миллати Эрон мухолифат доранд.

“Миллати мо, бо кумаки Худо ҳеч гоҳ роҳи таҳкими имон ва густариши донишҳои гуногунро тарк нахоҳад кард ва Эронро ба авҷи тараққӣ ва ифтихор хоҳем расонд” – зикр намуд Оятуллоҳ Хоманаӣ.

Роҳбари инқилоб бо тасаллияти дубора ба хонаводаҳои шаҳидони низомӣ, донишмандон ва мардуми бегуноҳе, ки дар ин ҷанг ба шаҳодат расиданд, гуфт: “Миллати Эрон дар ин 12 рӯз, ба ҷуз ифтихори бузург, ирода ва қудрати худро ба ҷаҳон нишон дод, ки дар муқобили душман сар фуруд намеорад”.

Оятуллоҳ Хоманаӣ ҳамчунин, аз устувории беназири пояҳои Ҷумҳурии Исломӣ ёдовар шуд ва афзуд, ки ин ҷанг на аввалин буд ва на охирин. Ҷумҳурии Исломӣ дар 46 соли ахир аз ҷанги 8-солаи таҳмилӣ то фитнаҳо ва кудатоҳо, ҳама гуна тавтиаҳои душманро хунсо кардааст.

“Асоси Ҷумҳурии Исломӣ бар ду пояи дину дониш қарор дорад ва мардуму ҷавонони Эрон бо такя ба ҳамин ду асос душманро дар саҳнаҳои мухталиф ба ақибнишинӣ водор кардаанд ва дар оянда низ ҳамин тавр хоҳад буд” – зикр кард Оятуллоҳ Хоманаӣ.

Роҳбари Эрон мухолифати аслиии истикбори ҷаҳонӣ, бахусус Амрикоро бо Ҷумҳурии Исломӣ бархостани сухани нав ва тавоноии илмию маънавии он дар арсаҳои мухталифи инсониву фаннӣ ва динӣ дониста, афзуд: “Гап аз ҳастаӣ ва ҳуқуқи башар фақат баҳона аст”.

“Мо қадамҳои бузург бар хоҳем дошт ва ба нури Худо Эронро ба ҷойгоҳи баланди илмӣ ва маънавӣ хоҳем расонд” – гуфт Оятуллоҳ Хоманаӣ.

Dialog.tj