Санъати кинои Тоҷикистон дар соли 2025 дар доираи Барномаи рушди кино барои солҳои 2023-2027 ва нақшаи татбиқи он барои солҳои 2023-2025 бо суръат рушд мекунад.

Тибқи натиҷаҳои озмуни филмномаҳо, ки аввали соли ҷорӣ доир гашт, аз 22 пешниҳоди расида, 16 лоиҳа барои истеҳсол тасдиқ шуд: 6 филми бадеии пурра, 7 филми мустанад, 1 филми тасвирӣ ва 2 лоиҳаи дигар дар марҳилаи тасдиқ қарор доранд.

Дар миёни филмҳои бадеӣ, ки ҳоло дар марҳилаи истеҳсол қарор доранд, драмаи таърихию ватандӯстонаи “Моҳӣ барои рафиқ Черчилл” мебошад, ки ба 80-солагии Ғалаба дар Ҷанги ҷаҳонии дуюм бахшида шудааст. Ҳамчунин, филми “Хоби сурх” (коргардон Соҳибёр Толиб) дар бораи сарбози пешин, ки пас аз ҷанг дар Афғонистон гирифтори бемории руҳӣ шудааст ва лоиҳаи муштараки Тоҷикистону Русия “Роҳи хашм”, ки ҳоло дар марҳилаи пас аз истеҳсол аст, зикр мешаванд.

Филми муштараки Тоҷикистон, Русия ва Эрон бо номи “Моҳича дар шаст” ҳоло ба анҷом расида, барои намоиш омода мешавад. Лоиҳаи дигари муштарак – филми таърихии “Дурахши ахтарон: Ҷомӣ ва Навоӣ” бо ҳамкории Ӯзбекистон таҳия шуда истодааст. Наворбардорӣ аз 1-уми августи соли ҷорӣ оғоз шуда, то поёни моҳи сентябр идома хоҳад ёфт. Барои ин лоиҳа 1500 адад реквизит, 750 либос, аз ҷумла 400 халат ва беш аз 300 кӯлоҳ омода шудааст.

Дар бахши филмҳои мустанад, филмҳои зиндагинома ва фарҳанги таърихӣ зикр шудаанд: “Ҳофизи Шерозӣ – пайванди тамаддунҳо”, “Абуалӣ ибни Сино”, “Қаҳрамони Тоҷикистон – Бобоҷон Ғафуров”, “Қалъаи Хуҷанд”, ҳамчунин, филми “Лонаи обӣ”, ки ба масъалаи ҳифзи пиряхҳо бахшида шудааст ва ҳоло дар марҳилаи наворбардорӣ қарор дорад.

Ягона филми тасвирии тасдиқшуда “Нахудак” аст, ки бар асоси афсонаҳои халқи тоҷик таҳия мегардад. Қисми дуюми он то охири соли ҷорӣ ба анҷом мерасад.

Кинои тоҷик дар соли 2025 дар як қатор ҷашнвораҳои байналмилалӣ низ ширкат дошт. Филми “Дар ҷустуҷӯи ҳақиқат” (коргардон Манзаралии Шералӣ) дар Ҷашнвораи кинои Авруосиё ҷоизаи “Беҳтарин сенария” –ро ба даст овард ва дар Бишкек бо диплом қадрдонӣ гардид. Филми “Зиндагӣ зебост” (коргардон Далер Раҳматов) дар Ҳиндустон бо ҷоизаи махсуси ҳакамон ва мукофоти молӣ қадрдонӣ гардид.

Dialog.tj