Дар Искандаркӯл, ки дар шимоли Тоҷикистон воқеъ аст, як ҷавони 18-сола, сокини ноҳияи Айнии вилояти Суғд дар вақти шиноварӣ дар минтақаи мамнуъ ғарқ шудааст. Дар ин бора Кумитаи ҳолатҳои фавқулода ва мудофеаи граждании назди Ҳукумати Ҷумҳурии Тоҷикистон хабар дод.

Ин ҳодисаи фоҷиавӣ субҳи 27-уми июли соли 2025 тақрибан соати 10:35 ба вақти маҳаллӣ рӯй додааст. Ба иттилои мақомот ҷавони ғарқшуда Каримзода Дилшод, соли таваллудаш 2007, сокини деҳаи Махшевати ҷамоати Фондарёи ноҳияи Айнӣ будааст.

Мувофиқи иттилои Кумита Каримзода Дилшод дар қисмати кӯл, ки шиноварӣ дар он ҷо қатъиян манъ аст, шино мекард. Ин минтақа бо сабаби чуқурии зиёд ва ҷараёнҳои хавфноки зериобӣ чандин бор боиси рӯй додани фоҷиаҳо шудааст.

Баъди расидани хабари ғарқшавӣ сокинон ба намояндаи Кумитаи ҳолатҳои фавқулода дар ноҳия муроҷиат кардаанд.

Кумитаи ҳолатҳои фавқулода бори дигар аз шаҳрвандон ва меҳмонони кишвар даъват кард, ки қоидаҳои бехатариро дар мавзеъҳои обӣ риоя кунанд ва аз ворид шудан ба минтақаи мамнуъ барои шиноварӣ қатъиян худдорӣ намоянд.

“Ҷони ҳар як инсон бебаҳо аст”- зикр кард, намояндаи Кумита.

Dialog.tj