Маҳмадсаид Шоҳиён, директори Муассисаи давлатии “Тоҷикфилм” 28-уми июл дар нишасти матбуотӣ иттилоъ дод, ки банаворгирии филми муштараки Тоҷикистону Ӯзбекистон “Дурахши ахтарон: Ҷомӣ ва Навоӣ” 1-уми август оғоз мешавад.

Манбаъ афзуд, ки сабт дар павилонҳои Муассисаи давлатии “Тоҷикфилм” оғоз шуда, дар маросими шурӯъи он муовини сарвазири Тоҷикистон, роҳбарияти “Ӯзбекфилм” ва “Тоҷикфилм” ва ҳунармандони ду кишвар иштирок хоҳанд кард.

Ба гуфтаи масъулин, марҳилаи аввали наворгирӣ моҳи август ва сентябр дар Тоҷикистон ва марҳилаи дувум моҳи октябр ва ноябр дар Ӯзбекистон доир мегардад.

Гуфта мешавад, ки ҳоло 40 ҳунарманди ӯзбекистонӣ дар Тоҷикистон қарор доранд ва бояд дар филм нақш офаранд. Ҳамчунин, маълумот дода шуд, ки филми мазкур дар қалъаҳои Балҷувон, Ҳисор, Хуҷанд ва дигар ҷойҳои таърихӣ сабт карда мешавад.

Тибқи нақша филми “Дурахши ахтарон: Ҷомӣ ва Навоӣ” ба муносибати ҷашни Наврӯз барои тамошобинони ҳар ду кишвар манзур мегардад.

Dialog.tj