Рӯзи 25-уми июл нишасти матбуотии Мақомоти иҷроияи ҳокимияти давлатии шаҳри Душанбе бо иштироки муовинони раиси шаҳр ва рӯзноманигорон доир гашт. Дар нишаст як қатор масъалаҳои муҳим мавриди баррасӣ қарор гирифтанд.

Масъулин шарҳдорӣ иттилоъ доданд, ки сохтмони таваққуфгоҳҳои бисёрошёна дар назди биноҳои баландошёна ва вазорату идораҳо ба нақша гирифта шудааст. Ба гуфтаи манбаъ, бунёди чунин таваққуфгоҳҳо ба камшавии танбашавии нақлиёт дар роҳҳо мусоидат мекунад.

Гуфта шуд, ки мувофиқи дастури раиси шаҳри Душанбе дар ҳамаи биноҳои истиқоматии бисёрошёна барои таваққуфгоҳи мошинҳо ҷой пешбинӣ шудааст, вале баъзе соҳибкорон онҳоро ба нуқтаи мошиншӯйӣ ва таъмири мошинҳо табдил додаанд, ки барҳам дода шуданд.

Масъалаи навбатие, ки дар нишасти матбуотӣ баррасӣ гардид, оғози сохтмони 7 эстакадаи нав дар ҳудуди шаҳри Душанбе буд.

Гуфта шуд, ки эстакадаҳо дар буриши кӯчаҳои Шерализода - хиёбони Ҳофизи Шерозӣ, буриши хиёбони Ҳофизи Шерозӣ-хиёбони Саъдии Шерозӣ бо кӯчаи Қаҳҳоров, буриши кӯчаи Назаршоев, кӯчаи Айнӣ бо хиёбони Саъдии Шерозӣ, буриши хиёбони Саъдии Шерозӣ бо кӯчаи Неъмат Қарабоев, буриши кӯчаҳои Қаҳҳоров бо Абай, буриши кӯчаи Қаҳҳоров бо хиёбони Абдураҳмони Ҷомӣ ва буриши кӯчаи Қаҳҳоров бо кӯчаи ҷанубӣ бунёд мешаванд.

Дар нишасти хабарии шаҳри Душанбе масъалаи кӯчонидани Боғи ҳайвонот низ баҳс шуд. Бинобар иттилои муовини раиси шаҳри Душанбе Толиб Раҳимзода, Боғи ҳайвоноти пойтахт ба наздикии шаҳри Ҳисор кӯчонида мешавад.

Манбаъ афзуд, ки ҳоло барои ҷудо намудани қитъаи замин дар шоҳроҳи Душанбе-Ҳисор корҳо оғоз гардида, баъди ба анҷом расонидани ҳуҷҷатгузорӣ масъалаи маблағгузории он баррасӣ мегардад.

Чанде пеш масъулин гуфта буданд, ки наздикии соҳили дарёи Варзоб барои бунёди Боғи ҳайвоноти нав интихоб шудааст, вале дар нишаст хабар доданд, ки он мавзеъро лоиҳакашон барои бунёди Боғи ҳайвонот номувофиқ арзёбӣ карданд.

Ҳамчунин, зимни нишасти матбуотӣ иттилоъ дода шуд, ки имсол дар ҳудуди шаҳри Душанбе 6 муассисаи таҳсилоти миёнаи умумии замонавӣ ва 10  муассисаи таҳсилоти томактабӣ ба истифода дода мешавад.

Дар ин росто, муовини якуми раиси шаҳри Душанбе Бахтиёр Шарифӣ гуфт, ки дар арафаи соли нави таҳсил зиёда аз се муассисаи таълимии ибтидоӣ низ ба истифода дода мешавад. Ин муассисаҳо аз ҷониби Мақомоти иҷроияи ҳокимияти давлатии шаҳри Душанбе ва соҳибкорони ватанӣ сохта шуда, бо тамоми таҷҳизоти муосири таълимӣ муҷаҳаз гардонида шудаанд.

Илова бар ин, гуфта шуд, ки дар ҳудуди шаҳри Душанбе сохтмони 30 муассисаи таҳсилоти миёнаи умумӣ бо 53 ҳазор ҷойи нишаст дар ду баст ва 77 муассисаи томактабӣ барои 18 ҳазор ҷойи нишаст идома дорад.

Dialog.tj