Дар шаҳри Хоруғ, маркази маъмурии Вилояти Мухтори Кӯҳистони Бадахшон Форуми байналмилалии соҳибкорию сармоягузорӣ таҳти унвони “Помиринвест-2025” баргузор гардид.

Тибқи иттилои мақомоти вилоят форуми имсола бо мақсади ҷалби сармоя ва тақвияти ҳамкориҳои минтақавӣ дар соҳаҳои афзалиятноки иқтисодӣ доир гардид.

Дар Форум намояндагони доираҳои соҳибкорӣ ва сармоягузорӣ аз дохили Тоҷикистон ва кишварҳои хориҷӣ, ҳамчунин, намояндагони мақомот ва созмонҳои байналмилалӣ ширкат карданд. Мақсади асосии ин чорабинӣ муаррифии имкониятҳои сармоягузорӣ, муҳити ҳуқуқии мусоид ва иқтидори истеҳсолии Бадахшон арзёбӣ гардид.

Роҳбарияти вилоят ва меҳмонони фахрӣ дар суханронии ифтитоҳӣ ба нақши калидии чунин чорабиниҳо дар рушди иқтисодию иҷтимоии минтақа таъкид карданд. Онҳо гуфтанд, ки Бадахшон бо иқтидори табиӣ, манзараҳои ҷалбкунандаи сайёҳӣ ва захираҳои сарватманд метавонад ба як маркази ҷолиби сармоягузорӣ табдил ёбад.

Дар чорчӯби форум намоишгоҳи маҳсулоти ватании ВМКБ низ доир гардид, ки дар он маҳсулоти кишоварзӣ, ҳунарҳои мардумӣ ва маҳсулоти саноатии минтақа пешкаши иштирокчиён шуд.

Форуми “Помиринвест-2025” яке аз иқдомҳои муҳимми рушди иқтисоди кӯҳистон ба ҳисоб рафта, ба гуфтаи масъулон метавонад заминаи мусоид барои ҷалби сармояи хориҷӣ ва таҳкими иқтисоди минтақа фароҳам орад.

Dialog.tj