Имрӯз, 25-уми июл зимни нишасти матбуотӣ раиси Кумитаи меъморӣ ва сохтмони назди Ҳукумати Ҷумҳурии Тоҷикистон Низом Мирзозода иттилоъ дод, ки дар давраи ҳисоботӣ дар ҷумҳурӣ ба масоҳати умумии 526,9 ҳазор метри мураббаъ хонаҳои истиқоматӣ ба истифода дода шудаанд.

Масъулини Кумита афзуданд, ки арзиши ҳар метри мураббаъи хона дар пойтахти кишвар ба 800 доллари амрикоӣ расидааст.

Низом Мирзозода гуфт, ки соҳибкорон дар гузоштани нарх озод ҳастанд. Ба гуфтаи ӯ, бо вуҷуди он ки имсол бо назардошти поёнравии қурби доллар, нархи маҳсулоти сохтмонӣ коҳиш ёфт, вале нархи манзил боло рафт.

Ҳамчунин, дар нишасти матбуотӣ зикр гардид, ки яке аз самтҳои асосии фаъолияти кумита таъмини шаҳру ноҳияҳои ҷумҳурӣ бо нақшаҳои генералӣ ва нақшаҳои муфассали банақшагирии маҳал мебошад. Дар ин росто, ҳоло 65 маркази шаҳру ноҳияҳои мамлакат пурра бо нақшаҳои генералӣ таъмин мебошанд. Дар ҳоли ҳозир дар кумита таҳия ва тасҳеҳи нақшаҳои генералӣ ва лоиҳаҳои муфассали банақшагирии шаҳру ноҳияҳо идома дорад.

Dialog.tj