Мақомоти маҳаллӣ дар Навори Ғазза мегӯянд, ки бар асари камбуди шадиди ғизо ва дору 115 нафар, асосан кӯдакон ва афроди солманд, аз гурусангӣ ҷони худро аз даст додаанд. Ин иттилоъ дар изҳороте аз сӯйи дафтари расонаҳои давлатӣ дар Ғазза нашр шуд.

Бар асоси гузориши расонаҳо сабаби асоси шиддат гирифтани буҳрони гуруснагӣ дар Навори Ғазза баста мондани гузаргоҳҳо барои 145 рӯз пайи ҳам гуфта мешавад. Чизе, ки боиси қатъ гардидани воридоти ёриҳои башардӯстона, аз ҷумла шири кӯдакон, оби ошомиданӣ ва маводи доруворӣ шудааст.

Расонаҳои фаластинӣ мегӯянд, барои пешгирӣ аз фурӯпошии комили инсонӣ Навори Ғазза дар як ҳафта ба ҳадди ақал 500 халта ғизо ниёз дорад.

Мақомоти Ғазза хабари расидани “садҳо мошини ёрӣ” ба минтақа ва “бартараф шудани гураснагӣ” –ро рад намуда, онро “ҳамраъйии хатарнок бо ривояти ишғолгарон” номидаанд. Онҳо гуфтанд, ки чунин иддаоҳоро талош барои рӯпӯш кардани “ҷиноятҳои ҷорӣ” дар Ғазза медонанд.

Мақомоти фаластинӣ бо нигаронӣ аз вазъият талаб карданд, ки ҷомеаи ҷаҳонӣ, аз ҷумла Созмони Милали Муттаҳид ва созмонҳои ҳуқуқи инсон барои шикастани муҳосираи Ғазза иқдоми ҷиддӣ кунанд. Дафтари расонаҳои давлатӣ аз кишварҳо даъват намуд, ки барои боз кардани гузаргоҳҳо ва вуруди ёриҳои башардӯстона, бахусус барои кӯдакон, фавран тадбир андешанд.

Ин ниҳод боз ҳам таъкид намуд, ки интиқоли кумаки инсонӣ бояд берун аз ҳар гуна фишорҳои сиёсӣ ва зери назорати мустақими ниҳодҳои байналмилалӣ сурат гирад.

Агентии Созмони Милали Муттаҳид барои кумак ба паноҳандагони фаластинӣ низ гуфт, ки дар анборҳои худ, аз ҷумла дар шаҳри Ал-Ариш миқдори кофии маводи ғизоӣ барои сесад ҳазор нафар мавҷуд аст, вале ба гуфтаи онҳо “мо то ҳол интизори иҷозати расмӣ барои ворид шудан ба Навори Ғазза ҳастем”.

“Дарҳоро боз кунед, муҳосираро хотима диҳад. Мо бояд тавонем ба кӯдакони гурусна кумак расонем”- зикр мекунад СММ.

Ҳамлаи Исроил ба Ғазза 7-уми октябри соли 2023 оғоз шуд, вале баъдан дар моҳи январи соли 2025 бо миёнҷигарии кишварҳои минтақа миёни Ҳамос ва Исроил оташбаси муваққатӣ ба даст омад. Бо вуҷуди ин, пас аз барҳам задани музокироти марҳалаи дувуми оташбас Исроил 28-уми март амалиёти низомии худро дубора оғоз кард. Созмонҳои ҳуқуқи башар ҳушдор додаанд, ки муҳосира ва гуруснагӣ дар Ғазза метавонад ба ҳайси “ҷинояти ҷангӣ” мавриди баррасӣ қарор гирад.

Dialog.tj