Дар соли 2024 барои муҳоҷирони меҳнатии Ӯзбекистон дар Русия соли бисёр душвор ва пурмушкилот буд. Дар пасманзари таҳдидҳои амниятӣ, ҳаракатҳои сиёсӣ ва авҷ гирифтани эҳсосоти зидди муҳоҷирон, миллионҳо шаҳрванди Ӯзбекистон дар муқобили маҳдудиятҳои шадиди ҳуқуқиву иҷтимоӣ қарор гирифтанд. Аммо бо вуҷдуи ин фишорҳо ҳаҷми пулҳои фиристодашуда ба ватан ба сатҳи рекорд - 9, 8 миллиард доллар фақат дар давоми 10 моҳ расид.

Мақомоти Русия дар посух ба ду амали террористии пурсарусадо, ҳамла ба толори консертии “Крокус сити холл” ва қатли як мақоми баланди низомӣ тадбирҳои сахтро бар зидди муҳоҷирон роҳандозӣ карданд. Дар натиҷа, муҳоҷирон ба маҳдудиятҳои нав рӯ ба рӯ шуданд: дар як қатор вилоятҳо онҳо аз ҳуқуқи кор дар бахши налиёт, савдои нӯшокиҳои спиртӣ, хизматрасонии умум ва ҳатто дар мактабҳо маҳрум гардиданд.

Станислав Притчин, таҳлилгари Пажӯҳишгоҳи иқтисоди ҷаҳонӣ ва робитаҳои байналмилалии Русия мегӯяд, ки ин сиёсати сахтгирона, қабл аз ҳама, аз ноамниҳои ахир бармеояд ва ба хотири “муназзамсозии муҳити муҳоҷират” роҳандозӣ гардидааст.

Президенти Русия Владимир Путин дар сафари расмии худ ба шаҳри Тошканд гуфта буд, ки “ҳуқуқу шароити меҳнатии шаҳрвандони Ӯзбекистон бояд ҳимоя шавад”. Аммо дар ҷараёни нишасти матбуотии солона ӯ гуфт, ки муҳоҷират наметавонад “ба зарари аҳолии аслии Русия” сурат гирад.

Ҳамзамон, дар поёни соли 2024 Владимир Путин фармонеро имзо намуд, ки бар асоси он ҳамаи муҳоҷирони ғайриқонунӣ бояд то поёни моҳи апрели соли 2025 мақоми худро расман ҳал ё кишварро тарк намоянд.

Dialog.tj