Президенти Ҷумҳурии Ӯзбекистон бо имзои фармоне як қатор тағйиротҳоро дар ҳайати мушовирони худ ворид намуд. Тағйироти кадрӣ ба бахшҳои муҳимми сиёсати хориҷӣ, иҷтимоӣ ва сиёсати кадрӣ рабт дорад.

Бар асоси фармони президент:
Абдулазиз Комилов ба вазифаи мушовири президент оид ба сиёсати хориҷӣ таъйин гардид. Ӯ қаблан, ба ҳайси намояндаи махсуси президент дар умури сиёсати хориҷӣ фаъолият мекард ва ҳоло аз он вазифа озод карда шуд;

Ғафурҷон Мирзоев ба ҳайси мушовири президент оид ба масъалаҳои кадрӣ таъйин гардида, аз вазифаҳои пешинааш - мушовири сиёсати кадрӣ ва директори Агентии рушди хидмати давлатӣ озод карда шуд;

Равшан Ғуломов ҳоло мушовири президент оид ба сиёсати иқтисодӣ таъйин шуд. Ӯ қабл аз ин ба ҳайси мушовир оид ба рушди иқтисодӣ ифои вазифа мекард;

Сардор Умурзоқов, ки қаблан мушовири президент оид ба супоришҳои махсус буд, ба мақоми мушовири президент оид ба рушди стратегӣ таъйин гардид;

Мансурбек Оллоёров ба вазифаи мушовири президент оид ба ҳифзи иҷтимоӣ ва ҳамчунин, директори Агентии миллии ҳифзи иҷтимоӣ таъйин шуд. Ӯ аз вазифаи пешини ҳаммонанд озод карда шуд;

Русланбек Давлатов ба ҳайси мушовири президент оид ба масъалаҳои мақомоти намояндагӣ, созмонҳои ғайриҳукуматӣ, дин ва ҷавонон таъйин гардид. Ӯ, қаблан, дар вазифаи мушовири президент оид ба масъалаҳои иҷтимоӣ-сиёсӣ, диниву маърифатӣ ва ҷавонон фаъолият мекард.

Ин тағйирот, ба гуфтаи коршинсон, ба таҳкими идоракунии давлатӣ ва татбиқи самтҳои нави сиёсати дохиливу хориҷии Ӯзбекистон равона шудаанд.

Dialog.TJ