Имрӯз, 21-уми июл зимни нишасти матбуотӣ Матлубахон Сатториён, вазири фарҳанги кишвар иттилоъ дод, ки Тоҷикистонро дар озмуни байналмилалии мусиқии "Интервидение" сарояндаи ҷавон Фаррух Ҳасанов намояндагӣ мекунад.

Ҳамчунин, Матлубахон Сатториён афзуд, ки ба ҷумҳурии мо расман даъватнома ирсол гардидааст ва пас аз даъват вазорат барои иштирок номзадии Фаррух Ҳасановро пешниҳод намудааст.

Вазири фарҳанг аз тамошобинон даъват кард, ки ҳангоми баромади намояндаи кишвар аз ӯ ҷонибдорӣ кунанд.

Ба иттилои дастрас, ҳоло Фаррух Ҳасанов барои иштирок дар озмуни байналмилалии мусиқии "Интервидение" омодагӣ дида истодааст.

Гуфта мешавад, ки намояндагони озмуни байналмилалии мусиқии "Интервидение" ба давлатҳое, ки номзадашон ширкат мекунад, сафар доранд ва рӯзҳои наздик аз Тоҷикистон низ дидан хоҳанд кард.

Дар нишасти матбуотии Вазорати фарҳанг инчунин масъалаи ташкили консертҳо дар “Кохи Борбад” баррасӣ гардид, ки дар ҷавоб Матлубахон Сатториён чунин гуфт:

- “Кохи Борбад муассисаи давлатии фарҳангӣ буда, ҳар нафаре нияти баргузории консерт ва ё чорабиниро дорад, ба вазорат муроҷиат намуда, дар сурати ба даст овардани иҷозат, метавонад онро доир намояд”.

Ёдовар мешавем, ки чанде пеш дар расонаҳо доир ба дастрас карда натавонистани иҷозат барои консерт бархе сарояндаҳо иброз доштанд, ки душворӣ мекашанд.

Dialog.TJ