Гурӯҳи террористии Толибон дар иқдоми нави худ фурӯши баъзе аз намудҳои бозичаҳои кӯдаконаро манъ карданд.

Тибқи иттилои расонаҳои маҳаллӣ, мақомоти амр ба маъруфи Толибон фурӯши баъзе аз бозичаҳои кӯдакона, аз ҷумла лухтакҳо” –ро “ҳаром” дониста, манъ кардаанд. Онҳо гуфтаанд, ки фурӯши баъзе аз бозичаҳо, аз ҷумла лухтакҳо мувофиқи шариати ислом ҳаром аст.

Ин маҳдудияти нави гурӯҳи террористии Толибон дар ҳоле иҷро мешавад, ки дар 4 соли ахир Толибон тақрибан фишорҳо аз болои навъҳои гуногуни фароғату бозии мардум, бахусус кӯдакон ва ҷавононро афзоиш додаанд. Баъзе аз фаъолон мегӯянд, ин иқдом як бахши дигар аз сиёсатҳои сахтгирона ва назорати ин гурӯҳ аст, ки зиндагии иҷтимоии афғонистониҳоро зери фишор қарор додааст.

Шиддат гирифтани фаъолиятҳои нозирони амр ба маъруф дар пойтахти Афғонистон – шаҳри Кобул низ нигарониҳоеро ба миён овардааст. Бар асоси иттилои расида, даҳҳо духтари ҷавон дар рӯзҳои ахир дар нуқтаҳои мухталифи шаҳр боздошт шудаанд, вале Толибон то кунун дар хусуси сабабҳои ин боздоштҳо изҳори назар накардаанд.

Созмонҳои ҳуқуқи башар ин иқдомҳоро нақзи ошкори озодиҳои шаҳрвандӣ ва ҳуқуқи кӯдакон дониста, аз гурӯҳи Толибон хостаанд, ки чунин иқдомҳоро манъ кунанд.

Dialog.tj