Президенти Иёлоти Муттаҳидаи Амрико Доналд Трамп гуфт, агар Эрон ният дошта бошад, ки иншооти атомии худро аз нав барқарор кунад, онҳо “ нобуд карда хоҳанд шуд”. Дар ин бора Доналд Трамп дар шабакаи иҷтимоии  "Truth Social" изҳори назар кардааст.

Ба гуфтаи Трамп “ҳамаи се иншооти атомии Эрон пурра вайрон ё нобуд карда шудаанд. Барқарор кардани онҳо ба чандин сол вақт ниёз дорад. Агар Эрон чунин ният дошта бошад, барояш судмандтар он хоҳад буд, ки ҳамаи равандро аз сари нав дар се макони алоҳида оғоз кунад, қабл аз он ки иншооти имрӯза нобуд гарданд”.

Ин изҳорот дар пасманзари афзоиши шиддат миёни Эрон ва кишварҳои аврупоӣ, бахусус пас аз таҳримҳои нави иқтисодии Амрико садо медиҳад.

Аз ҷониби дигар, намояндаи Кумитаи амнияти миллӣ ва сиёсати хориҷии парлумони Эрон Иброҳим Ризоӣ қаблан ба хабаргузории Тасним гуфта буд, ки Теҳрон дар посух ба фишорҳои фазояндаи таҳримҳо метавонад аз Созишномаи манъи густариши силоҳи атомӣ хориҷ шавад. Ӯ, инчунин, илова кард, ки Эрон метавонад ғанисозии уранро аз сатҳи 60 фоиз боло бурда, истеҳсолу содироти сентрифугаҳои пешрафтаро афзоиш диҳад.

Мақомоти Эрон қаблан гуфта буданд, ки ҳамкорӣ бо Агентии байналмилалии энергетикаи атомӣ (МАГАТЭ) пурра қатъ нашудааст, аммо минбаъд он метавонад дар шакли нав идома ёбад.

Dialog.TJ