Бинобар иттилои Маркази миллии тестии назди Президенти Ҷумҳурии Тоҷикистон довталабон имкон доранд аз 21-ум то 23-юми июл дар бинои марказ (шаҳри Душанбе), инчунин, дар нуқтаҳои иттилоърасонии шаҳру ноҳияҳои Хоруғ, Хуҷанд, Истаравшан, Панҷакент, Бохтар, Кӯлоб, Данғара, Рашт ва Шаҳритус дар бораи норозӣ будан аз холҳои дар ИМД – қисми А (имтиҳон дар заминаи таҳсилоти умумӣ) ё Б (имтиҳон дар заминаи таҳсилоти умумии асосӣ) гузошташуда аризаи апеллятсионӣ нависанд.

Гуфта мешавад, ки бо мақсади таъмини ҳуқуқи довталабон барои арзёбии воқеӣ ва ҳалли масъалаҳои баҳсталаби марбут ба тартиби гузарондан ё натиҷаҳои имтиҳонҳо ба довталаб ҳуқуқи навиштани аризаи апеллятсионӣ (дар шакли хаттӣ) дар бораи вайрон кардани тартиби муқарраргардидаи баргузории имтиҳон ва ё норозӣ будан аз холҳои гузошташуда дода мешавад.

Иттилоъ дода мешавад, ки баррасии аризаи апеллятсионӣ маънои аз нав имкони имтиҳон супоридан ё ба даст овардани холи иловагиро надорад, балки дар рафти он танҳо дурустии холҳои барои имтиҳон ба довталаб гузошташуда санҷида мешавад. Агар варақаҳои ҷавобҳои довталаб тавассути барномаи компютерӣ бе хатои техникӣ коркард шуда, холҳои барои имтиҳони ӯ гузошташуда дуруст бошанд, аризааш баррасӣ карда намешавад.

Dialog.TJ