Беш аз 600 оилаи тоҷик, ки солҳои тӯлонӣ дар ноҳияи Долтиёри вилояти Ғӯр сокин буданд, рӯзи гузашта ба таври иҷборӣ аз манзилҳояшон кӯчонида шуданд. Ба гуфтаи манобеи маҳаллӣ ин иқдом бо дастури маъмурони Толибон сурат гирифтааст.

Ин амал вокуниши шадиди сокинон ва фаъолони ҳуқуқи инсонро ба бор оварда, нигарониҳо дар хусуси эҳтимоли афзоиши табъиз ва поксозии қавмӣ дар Афғонистонро бештар намудааст. Бисёре аз танқидкунандагон мегӯянд, ки кӯчонидани иҷбории тоҷикон метавонад ба муноқишаҳои иҷтимоиву қавмӣ дар кишвар доман занад ва суботу амнияти минтақаи ҷанубу ғарбии Афғонистонро дар зери хатар қарор диҳад.

Созмонҳои ҳуқуқи башар ва фаъолони ҷомеаи шаҳрвандӣ аз Толибон талаб доранд, ки ба амалкардҳои табъизомез хотима диҳанд ва ҳуқуқи баробари ҳамаи ақвоми Афғонистонро риоя кунанд. Мақомоти Толибон то ба ҳол дар бораи ин ҳодиса вокуниши расмӣ нишон надодаанд. Бо вуҷуди ин, таҳлилгарон мегӯянд, чунин амал метавонад ваҷҳаи ин гурӯҳро дар миёни ақалиятҳои қавмии Афғонистон боз ҳам нохушояндтар кунад ва равандҳои созишу сулҳро дар кишвар мутаассир намояд.

Dialog.TJ