Бо фармони нави Президенти Ӯзбекистон Шавкат Мирзиёев, ба раиси тозатаъйини Дастгоҳи иҷроияи Президент Саида Мирзиёева як қатар ваколат ё салоҳиятҳои нави муҳим дода шудаанд. Ин қарор дар доираи талошҳо барои “баланд бардоштани самаранокӣ ва натиҷабахшии низоми идораи давлатӣ” гирифта шудааст.

Саида Мирзиёева, ки чанд ҳафта қабл ба ин мақом таъйин шуда буд, ҳоло ҳуқуқи таъйину озод кардани мушовирони президент ва муовинони роҳбарони бахшҳои зердаст, ҳамчунин, роҳбари котибот ва дигар шахсони масъулро дар ихтиёр дорад.

Бар асоси санади расмӣ, ӯ ҳамчунин, метавонад мутахассисони ватанӣ ва хориҷиро барои иҷрои барномаҳои стратегӣ ва рушди миллӣ ҷалб кунад ва ҳақ дорад, музди меҳнат ва асъори пардохти онҳоро муайян намояд.

Дар давоми ду ҳафтаи оянда хонум Мирзиёева бояд фаъолияти кормандони дастгоҳи президентиро арзёбӣ ва аз аттестатсия гузаронад. Ҳамчунин, бояд кадрҳои шоистаро барои идомаи фаъолият интихоб намояд.

Мушовирони президент ва роҳбарони бахшҳои сохтории дастгоҳ вазифадоранд, ки дар фурсати даҳ рӯз пешниҳодҳои рушдро таҳия ва ба баррасии ӯ пешниҳод намоянд.

Ёдовар мешавем, ки ахиран сохтори навшудаи Дастгоҳи президенти Ӯзбекистон бо 5 муовини роҳбар муаррифӣ шуд, ки ҳар кадом масъули пешбурди лоиҳаҳо дар бахшҳои маориф, соҳибкорӣ, тандурустӣ, манобеи об ва низоми додгоҳӣ мебошанд.

Саида Мирзиёева, духтари бузурги президенти феълии Ӯзбекистон аст ва то ҳол ба чанд вазифаи давлатӣ, аз ҷумла ҳамчун ёвари президенти кишвар, фаъолият кардааст. Идомаи болоравии сиёсии ӯ баҳсҳои зиёд дар ҷомеаи Ӯзбекистон ва берун аз онро барангехтааст.

Dialog.tj