Раёсати Вазорати корҳои дохилӣ дар шаҳри Душанбе аз боздошти ҷавондухтаре хабар дод, ки дар шабакаи иҷтимоии Инстаграм барои ба даст овардани маблағ ба паст задани шаъну шарафи корбарони фазои маҷозӣ машғул буд.

Манбаъ меафзояд, ки Каримиён Маҳинбону, масъули саҳифаи “zevarzoda_fors” дар шабакаи иҷтимоии “Инстаграм” бо мақсади зиёд намудани шумораи обуначиён ва бо ин роҳ ба даст овардани маблағ, наворҳои таҳқиркунандаи шаъну эътибори санъаткорон, фаъолони ҷомеа ва дигар шаҳрвандони касбу кори гуногунро дар саҳифаи худ бознашр мекард.

Саҳифаи “zevarzoda_fors” дар ҳоли ҳозир 652 ҳазор обуначӣ дошта, асосан, ба нашри наворҳои кӯтоҳ машғул аст. Ҳеҷ наворе аз худи муаллиф нест, балки ӯ дилхоҳ наворро гирифта, дар саҳифааш бознашр мекард, то ки сафи обуначиёнаш афзояд.

Гуфта мешавад, ки аз ҷониби кормандони милитсия бо Каримиён М. корҳои фаҳмондадиҳӣ гузаронида шуд.

Ҳамчунин, Раёсати ВКД дар шаҳри Душанбе ба иттилои шаҳрвандон мерасонад, ки ҳар нафаре бо номҳои мустаъор саҳифа таъсис дода, ба нашри наворҳои таҳқиркунандаи обру ва эътибори дигарон машғул мегардад, фаъолияти минбаъдаи саҳифаи ӯ манъ карда шуда, ҳамзамон, дар доираи қонун ба ҷавабгарӣ кашида мешавад.

Dialog.TJ