Оятуллоҳ Хоманаӣ, роҳбари олии Эрон дар мулоқот бо раиси Суди олии Эрон ва масъулони аршади низоми судии ин кишвар доир ба ҷанги таҳмилии ахир ва ноком шудани ҳисобу нақшаҳои таҷовузкорон ба ваҳдати бузурги миллати Эрон ишора намуда, таъкид кард, ки вазифаи ҳамаи афрод ҳифзи ваҳдати миллӣ аст.

Роҳбари олии Эрон таъкид кард, ки амали бузурги мардум дар ҷанги 12-рӯза натиҷаи азму ирода ва эътимод ба нафси миллӣ буд, зеро ҳузури руҳия ва омодагии муқовимат бо қудрате, ба мисли Амрико ва саги занҷирбанди он, режим саҳюнистӣ – Исроил, бисёр арзишманд аст. Оятуллоҳ Хоманаӣ бо ишора ба хотироти нашршудаи масъулони давраи подшоҳии Паҳлавӣ, ки ҳатто дар маҳфилҳои хусусӣ ҷуръати эътироз ба Амрикоро надоштанд, гуфт, имрӯз Эрон ба ҷое расидааст, ки на фақат аз Амрико наметарсад, балки Амрикоро ба тарс водор кардааст. Ба гуфтаи роҳбари Эрон, ин руҳия ва иродаи миллӣ ҳамон чизест, ки Эронро сарбаланд месозад ва ба ормонҳои бузургаш мерасонад.

Оятуллоҳ Хоманаӣ бо таъкид ба ин ки дӯсту душман бояд бидонанд, ки миллати Эрон дар ҳич арсае ба сифати ҷониби заиф ҳозир намешавад, афзуд: "Мо бо ҳамаи абзори зарурӣ, ба монанди мантиқ ва неруи низомӣ муҷаҳҳазем. Бинобар ин, чӣ дар майдони дипломатия ва чӣ дар майдони низомӣ ҳар гоҳ ворид шавем, ба инояти Худо бо дасти пур ворид хоҳем шуд".

Бо вуҷуди он ки режими саҳюнистиро саратон ва Амрикоро ба хотири ҳимоят аз он ҷинояткор медонем, аммо ба истиқбол ва пешвози ҷанг нарафтем, гарчи ҳар гоҳ душман ҳамла кард, посухи мо кӯбанда ва муҳкам буд”- таъкид намуд Оятуллоҳ Хоманаӣ.

Роҳбари олии Эрон далели аслии ниёзмандии режими Исроил ба Амрикоро нотавонии он донист ва гуфт, ки агар режими саҳюнистӣ қудрати дифоъ дошт, водор намешуд ба Амрико паноҳ барад.

Роҳбари Эрон посухи ҷавобии Эрон ба ҳамлаи Амрикоро бисёр “зарбаи ҳассос” номида, илова кард, марказе, ки Эрон мавриди ҳадаф қарор дод, маркази фавқулода ҳассоси Амрико дар минтақа буд ва агар сензураи хабарӣ бардошта шаванд, маълум хоҳад шуд, ки Эрон чӣ зарбаи бузург ворид кардааст. Ӯ таъкид кард, албатта метавон зарбаи бузургтаре низ ворид кард.

Оятуллоҳ Хоманаӣ зуҳури амри миллӣ дар ҷанги охирро бисёр муҳим ва сарчашмаи иҷрои нақшаи душман донист ва илова намуд, нақшаи таҷовузгарон ин буд, ки бо ҳамла ба шахсиятҳо ва марказҳои муҳим низомро заиф созанд ва сипас, бо фаъолсозии омилони дохилӣ, аз мунофиқону ҷонибдорони подшоҳӣ то авбошон мардумро ба шуриш барангезанд ва низомро суқут диҳанд.

"Дар асл комилан баръакси нақшаи душман рӯй дод. Ин нишон дод, ки бисёре аз ҳисобу китобҳо ва тахминҳои баъзе афрод дар масъалаҳои сиёсӣ нодуруст буданд. Худо нақшаи душманро ботил кард ва мардумро ба ҳимоят аз низом вориди майдон намуд. Мардум ба зидди фикри душман, ҳам ҷонан ва ҳам молан аз низом ҳимоят карданд” – таъкид намуд Оятуллоҳ Хоманаӣ.

Dialog.TJ