Дар даври нимниҳоии Ҷоми ҷаҳонии бошгоҳҳо дастаҳои “ПСЖ”-и Фаронса ва “Реал Мадрид” рақобат карданд, ки дар натиҷа дастаи фаронсавӣ ба дарвозаи тими испанӣ чор голи беҷавоб зад.

Дуруст аст, ки пеш аз вохӯрии дастаҳои “ПСЖ” ва “Реал Мадрид” аксари коршиносон ба ғалабаи бошгоҳи фаронсавӣ бовар доштанд, зеро ин мавсим дастаи мазкур дар ҳама мусобиқаҳо хеле хуб ҳунарнамоӣ мекунад ва то имрӯз чор унвони қаҳрамониро соҳиб шуд. Чун бошгоҳи “Реал Мадрид”-ро шоҳона меноманд, боварҳо буданд, ки агар ғалаба насиби “ПСЖ” шавад ҳам, фарқи голҳо ва бозӣ кам хоҳад буд. Вале дар майдон қариб, ки як даста бозӣ мекард, зеро дар 9 дақиқаи аввал “Реал Мадрид” ба дарвозаи худ ду гол сар дод ва рӯҳияи бозингарон шикаста шуд.

Ду голи аввалро футболбозони "ПСЖ" Фабиан Руис (дақиқаи 6-ум) ва Усмон Дембеле (дақиқаи 9-ум) маҳз бо иштибоҳи муҳофизатгарони дастаи шоҳона ба дарвозаи “Реал Мадрид” ворид карданд.

Ҳамчунин, Фабиан Руис дар дақиқаи 24-ум боз гол зад ва ҳамдастаи ӯ Гонсалу Рамуш дар дақиқаи 88-ум тавонист, ки голи чоруми тимашро ба самар расонад.

Ҳамин тавр, футболбозони “Реал Мадрид” муқобили бошгоҳи “ПСЖ” коре карда натавонистанд ва аз ҳаққи идомаи рақобат маҳрум шуданд.

Хаби Алонсо, мураббии “Реал Мадрид” дар нишасти матбуотии пас аз бозӣ иброз дошт, ки бозии мазкур барои онҳо санҷиши калон шуд ва дарк карданд, ки дар куҷо қарор доранду бояд чӣ корҳоро анҷом диҳанд.

Ёдовар мешавем, ки шоми 13-уми июл дар даври ниҳоии Ҷоми ҷаҳонии бошгоҳҳо дастаҳои "ПСЖ" ва “Челси” барои унвони қаҳрамонӣ мубориза хоҳанд бурд.

Dialog.tj