Ҳаракати муқовимати исломии Ҳамос эълон кард, ки барои суръат бахшидан ба ҷараёни музокироти сулҳ ва ба ҳадаф расонидани кӯшишҳои байналмилалӣ ба озод кардани 10 асири исроилӣ омода аст.

Ҳамос дар як изҳорот таъкид кардааст, ки роҳбарони ҳаракат ба таври фишурда ва масъулона барои муваффақияти музокироти ҷорӣ, ки бо ҳадафи поён бахшидан ба ҷанг, таъмини вуруди озоду амни кумакҳои башадрӯстона ва кам кардани ранҷу машаққати мардуми Ғазза ҷараён дорад, талош доранд.

Дар ин изҳорот омадааст, ки дар ҳамин замина Ҳамос бо нишон додани чандандешии лозим як қадами амалиро ба сӯи пешбурди музокирот гузоштааст. Бо вуҷуди ин, масъалаҳои калидӣ ҳамоно дар рӯи мизи музокирот боқӣ мондаанд, аз ҷумла талаботи асосии Ҳамос барои хуруҷи комили неруҳои ишғолгари Исроил дар Навори Ғазза, таъмини расониши мунтазами кумакҳо ва пешниҳоди кафолатҳои воқеӣ барои барқарорсозии оташбаси доимӣ.

Ҳамос дар поёни изҳороташ афзуда, ки музокирот бо меонаҳо ва сарпечиҳои Исроил рӯ ба рӯ аст, “дар ҳоле ки Ҳамос бо руҳи мусбат ва ҷидду ҷаҳд бо миёнҷигарон ҳамкориро идома медиҳад, то ин монеаҳо бартараф шаванд ва ранҷи мардуми Фаластин поён ёбад”. Инчунин, таъкид гардида, ки иҷрои талаботи қонунии мардуми Фаластин дар самти озодӣ, амният ва зиндагии бошарафона ҳадафи аслии Ҳамос боқӣ мемонад.

Dialog.tj