Вилояти Хатлон қалби таърих ва табиати Тоҷикистон дар шаш моҳи аввали соли 2025 мизбони 554,498 сайёҳ, аз ҷумла 45,970 меҳмони хориҷӣ ва 508, 528 сайёҳи дохилӣ буд. Ин омор, ки аз шуъбаи рушди сайёҳии Мақомоти иҷроияи ҳокимияти давлатии вилояти Хатлон нашр шуд, аз афзоиши бесобиқаи таваҷҷуҳ ба ин минтақаи дорои мероси бойи таърихӣ ва табиати нотакрор шаҳодат медиҳад.

Хатлон бо 940 ёдгорӣ ва мавзеи таърихӣ-фарҳангӣ, аз қабили Қалъаи Ҳулбук, Тахти Сангин, мақбараи Мир Саид Алии Ҳамадонӣ ва зиёратгоҳи Чилучорчашма ба як маркази муҳимми ҷалби сайёҳони дохилӣ ва хориҷӣ табдил ёфтааст. Ин мавзеъҳо дар канори манзараҳои дилфиреби кӯҳҳои сарбафалак, рӯдҳои зулол ва чашмаҳои шифобахш, ба монанди Сари Хосор ва Чилдухтарон, ба Хатлон ҷаззобияти хосае бахшидаанд, ки ҳамасола садҳо нафарро ба ин минтақа мекашад.

Ба гуфтаи мақомоти маҳаллӣ вилояти Хатлон бо 120 меҳмонхона, 252 истироҳатгоҳ, 142 тарабхона, 128 чойхона, 45 осорхона ва 50 хонаи пазироии меҳмон (ҳомстей) барои қабули сайёҳон хуб муҷаҳҳаз аст. Илова бар ин, 371 банкомат, 69 мағозаи фурӯши армуғон ва 26 маркази иттилооти сайёҳӣ ба меҳмонон хизмат мерасонанд. Ин инфрасохтор, дар якҷоягӣ бо 45 боғи фарҳангӣ-фароғатӣ ва 115 зиёратгоҳ, шароити мусоидеро барои истироҳат ва кашфи мероси Хатлон фароҳам овардааст.

Хатлон на фақат бо табиат ва таърихи худ, балки бо ҳунарҳои мардумии ғании худ низ машҳур аст. Чакандӯзӣ, гулдӯзӣ, чӯбтарошӣ ва заргарӣ, аз ҷумлаи ҳунарҳое мебошанд, ки дар намоишгоҳҳо ва фестивалҳои ҷаҳонӣ муаррифӣ шуда, обрӯи фарҳанги тоҷикро баланд мебардоранд. Мағозаҳои армуғон дар саросари вилоят маҳсулоти дастсози ҳунармандони маҳаллиро ба сайёҳон пешкаш мекунанд, ки аксаран ҳамчун нишонаи фарҳанги пурғановати Хатлон харидорӣ мешаванд.

Тибқи таҳлилҳо теъдоди сайёҳони хориҷие, ки ба Хатлон сафар мекунанд, пайваста афзоиш меёбад. Мавзеъҳое чун мақбараи Имом Зайналобиддин, зиёратгоҳи Ҳазрати Султон Увайси Қаранӣ ва Қалъаи Муъминобод, аз ҷумла маконҳои маъруфе мебошанд, ки диққати ҷомеаи ҷаҳониро ба худ ҷалб кардаанд. 19 ширкати сайёҳии фаъол дар вилоят нақши калидӣ дар таблиғи ин мавзеъҳо ва ҷалби меҳмонони хориҷӣ бозӣ мекунанд.

Мақомоти вилояти Хатлон талош доранд, ки бо такмили инфрасохтор ва таблиғи бештари иқтидори сайёҳии минтақа Хатлонро ба як маркази муҳимми сайёҳии Осиёи Марказӣ табдил диҳанд. Бо таваҷҷуҳ ба афзоиши талабот ба сайёҳии экологӣ ва фарҳангӣ дар бозори ҷаҳонӣ Хатлон бо манзараҳои нотакрор, ёдгориҳои таърихӣ ва меҳмоннавозиҳои мардуми худ омодааст, ки дар солҳои оянда шумораи бештари сайёҳонро пазироӣ кунад.

Ин сафари афзояндаи сайёҳон ба Хатлон на фақат нишонаи ҷаззобияти табиӣ ва фарҳангии он, балки тасдиқи муваффақияти Тоҷикистон дар муаррифии худ ҳамчун як макони муҳимми сайёҳии ҷаҳонӣ мебошад.

Dialog.tj