Кумитаи давлатии амнияти миллии Ҷумҳурии Тоҷикистон се шаҳрвандро бо гумони даст доштан дар муомилоти ғайриқонунии маводи мухаддир дастгир кард.

Манбаъ меафзояд, ки зимни гузаронидани амалиёти махсуси кормандони Раёсати Кумитаи давлатии амнияти миллӣ  дар вилояти Суғд дар ҳудуди шаҳри Панҷакент шаҳрвандон Рустамов Абдуҳалим Баҳромович, соли таваллудаш 1975, (қаблан бо моддаи 249 қисми 2-и Кодекси ҷиноятии Ҷумҳурии Тоҷикистон суд шудааст), Олимов Муродқул Орифович, соли таваллудаш 1971 (қаблан бо моддаи 200-и Кодекси ҷиноятии Ҷумҳурии Тоҷикистон суд шудаааст) ва Усмонов Пирумқул Умарқулович, соли таваллудаш 1978, зода ва сокинони ҷамоати деҳоти Фароби шаҳри Панҷакент бо гумони даст доштан дар муомилоти ғайриқонунии маводи мухаддир боздошт карда шуда, аз онҳо маводи нашъадор дар ҳаҷми махсусан калон  (24 бастаи селофанӣ) дарёфт ва мусодира гардид.

Дар хабарномаи Кумита омадааст, ки Абдураҳим Рустамов аз ҳисоби ҳамдеҳагони худ Муродқул Олимов ва Пирумқул Усмонов гурӯҳи фаромиллии нашъаҷалоб созмон дода, маводи нашъадорро дар манзили истиқоматии Пирумқул  Усмонов пинҳон намудаанд. Мувофиқи маслиҳати пешакӣ онҳо мақсад доштанд, ки бо истифода аз торикии шаб маводи мухаддирро аз самти ноҳияи Панҷакент, тавассути убури ғайриқонунии сарҳади давлатӣ, ба кишвари ҳамсоя интиқол диҳанд.

Мувофиқи маълумотномаи шуъбаи ташхисӣ-криминалистии Раёсати Вазорати корҳои дохилии Ҷумҳурии Тоҷикистон дар вилояти Суғд, маводи нашъаовари мусодирашуда 13 кг навъи “героин”, 7 кг навъи “Фафюн” ва 4 кг навъи “ҳашиш” буда, вазни умумиашон 24 килограмро ташкил медиҳад.

Иттилоъ дода мешавад, ки бо ҳукми суди шаҳри Панҷакент Рустамов Абдуҳалим Баҳромович ба муҳлати 16 сол, Олимов Муродқул Орифович ба муҳлати 16 сол ва Усмонов Пирумқул Умарқулович ба муҳлати 15 сол аз озодӣ маҳрум карда шуданд.

Dialog.tj