Тавре маркази матбуоти Вазорати маориф ва илми Ҷумҳурии Тоҷикистон хабар медиҳад, хонандагони тоҷик аз Олимпиадаи байналмилалии “Архимед” ба дастоварди назаррас ноил гардиданд.

Манбаъ меафзояд, ки дар шаҳри Тошканди Ҷумҳурии Ӯзбекистон маросими бошукӯҳи қадрдонии ғолибони Олимпиадаи байналмилалии “Архимед” баргузор гардид, ки дар он дастаи мунтахаби Ҷумҳурии Тоҷикистон сазовори шумораи умумии 63 медал шуд.

Гуфта мешавад, ки хонандагони боистеъдоди тоҷик аз Олимпиадаи байналмилалии “Архимед” 6 медали тило, 20 медали нуқра ва 37 медали биринҷӣ ба даст оварданд.

“Ин дастоварди хонандагони тоҷик нишондиҳандаи омодагии ҳамаҷониба ва сатҳи баланди дониши онҳо дар арсаи байналмилалӣ мебошад. Ғолибон ва аъзоёни дастаи мунтахаби Тоҷикистон тавонистанд, ки маҳорат ва истеъдоди худро ба намоиш гузоранд ва парчами Тоҷикистонро дар ин чорабинии бонуфузи илмӣ парафшон созанд”, - омадааст дар хабарномаи Вазорат.

Dialog.tj