Имсол дар 10-умин Форуми байналмилалии фарҳангӣ — маърифатии давлатҳои иштирокчии Ассамблеяи байнипарламентии Иттиҳоди Давлатҳои Мустақил, ки дар шаҳри Мински Ҷумҳурии Беларус доир мегардад, Ҷумҳурии Тоҷикистонро 10 нафар намояндагӣ мекунанд.

Дар ин росто, Мавсума Муинӣ, муовини раиси Маҷлиси намояндагони Маҷлиси Олии Ҷумҳурии Тоҷикистон бо даҳ нафар наврасону ҷавонони соҳибистеъдоди ҷумҳурӣ, ки Тоҷикистонро дар форуми мазкур намояндагӣ мекунанд, вохӯрӣ намуд.

Тибқи иттилои сомонаи Маҷлиси намояндагони Маҷлиси Олии Ҷумҳурии Тоҷикистон, форуми имсолаи “Кӯдакони Иттиҳод: муколама ва пайванди ногусастании замон ва наслҳо” зери шиори “Гузаштаро ҳифз ва ояндаро месозем” аз 7-ум то 16-уми июли соли равон баргузор гашта, иштирокчиён анъана ва урфу одатҳои миллии кишварҳои ИДМ-ро муаррифӣ хоҳанд кард.

Форуми байналмилалии фарҳангӣ-маърифатии давлатҳои иштирокчии Ассамблеяи байнипарламентии Иттиҳоди Давлатҳои Мустақил ҳамасола беш аз 1000 нафарро аз кишварҳои узви ИДМ, аз ҷумла ҷумҳуриҳои Арманистон, Беларус, Озарбойҷон, Молдова, Қазоқистон, Қирғизистон, Федератсияи Русия, Тоҷикистон ва Узбекистон ба ҳам меорад.

Гуфта мешавад, ки ҳадаф аз ташкили форуми мазкур тарбияи наврасону ҷавонон дар руҳияи неки ҳамсоягӣ ва ҳамкорӣ, тарғиби арзишҳои инсонпарварона, сулҳу ваҳдат, омӯзиш ва арҷгузорӣ ба урфу одат ва фарҳангу тамаддуни ҳамдигар, табодули маълумоту таҷриба ва рушди зеҳнии онҳо маҳсуб меёбад.

Ҳамчунин, зимни мулоқот Мавсума Муинӣ иброз дошт, ки Ҳукумати Ҷумҳурии Тоҷикистон, бахусус Президенти Ҷумҳурии Тоҷикистон муҳтарам Эмомалӣ Раҳмон ба масъалаи таълиму тарбияи насли наврас таваҷҷуҳи хос дошта, онҳоро ояндаи миллату давлат меноманд. Ва боварӣ карда мешавад, ки наврасону ҷавонон ҷавобан ба ғамхориҳои пайвастаи Пешвои миллат муҳтарам Эмомалӣ Раҳмон бо баҳои хубу аъло таҳсил мекунанд.

Dialog.tj