Вазорати меҳнат ва ҳифзи иҷтимоии Федератсияи Русия тасмим гирифтааст, ки то охири соли ҷорӣ лимити ҷалби муҳоҷирони кориро бе тағйир боқӣ гузорад ва ба ҷои он бештар ба рушди захираҳои дохилӣ таваҷҷуҳ кунад.

Антон Котяков, Вазири меҳнат ва ҳифзи иҷтимоии Федератсияи Русия дар ин бора хабар дода, афзудааст, ки лимит ё квотаи умумии ҷалби коргарони хориҷӣ барои соли 2025 бо ҳаҷми 235 ҳазор нафар аллакай тасдиқ шудааст ва барои афзоиши он ҳич зарурат вуҷуд надорад.

“Мо имконият дорем, ин квотаро дар давоми сол миёни минтақаҳо ва ширкатҳо бар асоси талаботи воқеӣ тақсим кунем”- таъкид намудааст вазир.

Ба гуфтаи вазир, ҳадафи ин иқдом таъмини ҷойҳои корӣ ба воситаи неруҳои кории дохилӣ буда, фақат дар ҳолати зарурат истифодаи қувваи кории хориҷӣ баррасӣ хоҳад шуд.

“Мо бояд механизми ҷалби муҳоҷиронро тағйир диҳем, то ин раванд бо ҳадаф ва мутобиқ ба ҷойҳои корӣ мушаххас бошад” – таъкид намуд Антон Котяков.

Ин вазорат дар ҳамкорӣ бо Вазорати рушди рақамӣ ва дигар сохторҳои давлатӣ лоиҳаи нави ҷалби танзимшудаи муҳоҷиронро омода мекунад. Ба гуфтаи Котяков технологияҳои иттилоотӣ ба шаффофият ва назорати ҷалби қувваи корӣ кумак мекунад ва қисме аз қонунгузории лозима аз ҳоло ба Думаи давлатӣ пешниҳод шудааст.

Вазорат таъкид кардааст, ки барои рафъ кардани камбудии кадрҳо бештар бояд ба имкониятҳои ҷавонони то 29-сола такя кард. Бо ин ҳадаф, ҳамкорӣ бо муассисаҳои таълимӣ барои омода намудани мутахассисон бар асоси талаботи бозори меҳнат тақвият дода мешавад.

Ба гуфтаи манбаъ, лоиҳаи нави қонуни ҷалби муҳоҷирон, ки дар аввали баҳори соли 2024 пешниҳод шуда буд, баъди ислоҳу такмил барои баррасии иловагӣ ба парлумон ирсол хоҳад шуд.

Dialog.tj