Тавре аз бахши матбуот ва робита бо ҷомеаи Китобхонаи миллии Тоҷикистон хабар медиҳанд, дар доираи ҳамкориҳо бо Агентии ИМА оид ба рушди байналмилалӣ (USAID) дар шуъбаи хизматрасонӣ ба шахсони имконияташон маҳдуд “Гӯшаи китобҳои гӯё” таъсис ёфт.

Манбаъ меафзояд, ки аз ҷониби USAID ба шуъбаи хизматрасонӣ ба шахсони имконияташон маҳдуд китобҳои гӯё ва имову ишора дар шакли электронӣ ва ҳамчунин китобҳои чопӣ тақдим гардид, ки ҳадаф аз ин иқдом дастгирии афроди маълул ва беҳбудӣ бахшидан ба шароити омӯзиш мебошад.

Гуфта мешавад, ки як қатор китобҳои савтӣ ва имову ишора аз тарафи кормандони шуъба аввал ба компютерҳо ва баъдан ба ноутбукҳои дар хидмати хонандагонбуда боргирӣ шуданд, ки ин барои хонандагони қувваи босираашон суст ва маҳдуд (нобиноён) туҳфаи арзишманд аст.

Зикр мегардад, ки китобҳои Ато Мирхоҷа “Эҳсосамро шиносам”, Муҳриддин Сабурӣ “Мисли худат бош”, Роберт Макклоски “Марминҷон барои Соро”, Муродалӣ Собир “Наҷоти моҳиён” ва ғайраҳоро, ки савтӣ ҳастанд, дар “Гӯшаи китобҳои гӯё” ҷой дода шуданд.

Dialog.tj