Сарчашмаҳои огоҳ хабар доданд, ки Исроил бо оташбаси 60-рӯза дар Навори Ғазза розӣ шудааст. Доналд Трамп, Президенти Амрико гуфт, ки ин созиш бо шарти мушаххас аз сӯи Исроил қабул шудааст ва ҳоло навбат ба Ҳамос аст, ки қарори ниҳоиро қабул кунад.

Доналд Трамп рӯзи 1-уми июли соли 2025 дар изҳороте дар шабакаҳои иҷтимоӣ навишт: “Шароити беҳтар аз ин даст намедиҳад. Ҳамос набояд ин имкониятро аз даст диҳад”.

Бар асоси лоиҳаи пешниҳодшуда, ки ба воситаи Миср ва Қатар ба Ҳамос ирсол шудааст, масъалаи озод кардани гаравгонҳои исроилӣ бар ивази раҳоии зиндониёни фаластинӣ дар назар гирифта шудааст. Ин пешниҳодест, ки дар музокиротҳои қаблӣ низ борҳо баррасӣ шудааст.

Манбаи наздик ба музокиро ба шабакаи хабарии байналмилалии “CNN” гуфт, ки нигарониҳо ва шароити ҷониби фаластинӣ низ то андозае дар лоиҳаи нав инъикос ёфтааст, аммо ҳоло маълум нест, ки Ҳамос ин лоиҳаро қабул мекунад ё на.

Гуфта мешавад, ки рӯзи душанбеи ҳафтаи оянда президенти Амрико дар Вашингтон бо Бенямин Нетаняҳу, сарвазири Исроил мулоқоту гуфтугӯ хоҳад дошт. Ин мулоқот метавонад нақши калидӣ дар муайян намудани сарнавишти лоиҳаи оташбасро бозӣ кунад.

Dialog.tj