Ислом Махачев, собиқ чемпиони UFC дар вазни сабук, ки то имрӯз дар рӯйхати беҳтарин рамзкорони ҷаҳон новобаста аз вазн садрнишин буд, мавқеашро аз даст дод.

Нисфирӯзии 1-уми июл ташкилоти UFC рӯйхати нави рамзкорони беҳтарини ҷаҳонро дар сомонаи расмиаш нашр кард ва тибқи он, акнун беҳтарин варзишгари муҳорибаҳои омехта новобаста аз вазн чемпиони вазни сабук Илия Топурия ҳисобида мешавад.

Топ-3 размкори беҳтарин новобаста аз вазн Илия Топурия, Ислом Махачев ва Мераб Двалишвили мебошанд.

Ёдовар мешавем, ки 29-уми июн дар Лас-Вегаси Амрико мусобиқаи UFC 317 доир гашт, ки дар муҳорибаи асосии он собиқ чемпиони UFC дар вазни сабук Чарлз Оливейра ва собиқ чемпиони UFC дар вазни нимсабук Илия Топурия барои камарбанди чемпионӣ дар вазни сабук рақобат карда, Илия Топурия дар руанди якум ҳарифашро накаут кард ва қаҳрамони нави UFC дар вазни сабук гардид.

Маҳз муҳорибаи охири Илия Топурия ва чемпион шуданаш ӯро дар рӯйхати беҳтарин рамзкорони ҷаҳон новобаста аз вазн садрнишин кард.

Ҳамчунин, пас аз нашри рӯйхати нав ҳаводорони ММА, ки Ислом Махачевро мухлисӣ мекунанд, дар шабкаҳои иҷтимоӣ норозигӣ намуда истодаанд.

Dialog.tj