Ҷумҳурии Қазоқистон бо қабули қонуни нав пӯшондани рӯй, аз ҷумла пӯшидани бурқа ва ниқобро дар ҷойҳои ҷамъиятӣ расман манъ кард.

Рӯзи 30-уми июн президенти Қазоқистон Қосим - Жомарт  Тоқаев қонуни навро ба имзо расонид, ки бар асоси он пӯшидани рӯй бо ҳама навъ либос ва воситаҳо барои таъмини амнияти ҷамъиятӣ ва шинохтани беҳтари шахс дар ҷойҳои ҷамъиятӣ манъ аст. Ин қонун аз сӯйи парлумони Қазоқистон қабул ва ба президенти кишвар пешниҳод шуда буд.

Бар асоси матни қонун пӯшидани бурқа, ниқоб ва дигар либосҳое, ки чеҳраи шахсро комилан пинҳон мекунанд, дар ҷойҳои ҷамъиятӣ, аз ҷумла кӯча, бозор, марказҳои савдо ва нақлиёти ҷамъиятӣ манъ аст. Ин қонун бо номи “Дар бораи таъмини шинохти шахсӣ ва тартиботи ҷамъиятӣ” қабул ва расман мавриди иҷро қарор гирифт.

Дар қонун оиди пӯшондани чеҳра истисноҳое низ муайян шудааст. Дар он зикр шудааст, ки истифодаи ниқобҳои тиббӣ, таҷҳизоти муҳофизатӣ ва пӯшидани рӯй барои муҳофизат аз обу ҳавои сард дар ҳолате иҷоза дода мешавад, ки чеҳра қисман намоён бошад.

Мақомоти қазоқ таъкид кардаанд, ки барои вайрон кардани талаботи қонун ҷарима дар ҳаҷми аз 10 то 50 ҳазор танга ва дар сурати такрори дубораи қонуншиканӣ ҷавобгарии ҷиноӣ, дар шакли корҳои ислоҳӣ пешбинӣ шудааст.

Ержан Саденов, вазири корҳои дохилии Ҷумҳурии Қазоқистон дар шарҳи қонуни мазкур гуфт, ки ин қонун “қадами муҳим барои амнияти ҷомеа” аст ва “агар шахс чизе барои пинҳон кардан надошта бошад, пас чаро бояд рӯйшро пӯшонад?”

Қосим-Жомарт Тоқаев низ дар шарҳи қонун чунин гуфта буд: “Мо бояд фарҳанги миллии худро эҳтиром намоем ва ҷомеаи кушод ва боэътимодро ҳифз кунем. Пӯшидани рӯй метавонад амнияти ҷамъиятиро зери хатар гузорад ва ҳиссиётро дар миёни мардум тағйир диҳад”.

Гуфта мешавад, ки қонуни қабулшудаи Қазоқистон бар асоси таҷрибаи баъзе аз кишварҳои Осиёи Марказӣ, аз ҷумла Ӯзбекистон, Тоҷикистон ва Қирғизистон қабул шудааст. Ҳамчунин, баъзе аз кишварҳои ғарбӣ, аз ҷумла Фаронса, Нидерландия ва Дания низ бо қабули қонун бастани ниқоб ва бурқа дар ҷойҳои ҷамъиятиро манъ кардаанд.

Dialog.tj