Эмомалӣ Раҳмон, Президенти Тоҷикистон 26-уми июн расман неругоҳи барқи обии “Себзор” – ро дар ноҳияи Роштқалъаи Вилояти Мухтори Кӯҳистони Бадахшон мавриди истифода қарор дод.

Ба гуфтаи масъулин ин лоиҳа, ки бо ҷалби сармояи хориҷӣ ва ширкати бахши хусусӣ сохта шудааст,  иқдоми муҳим дар самти густариши “иқтисоди сабз” ва таъмини барқи тоза ба минтақаҳои дурдасти кишвар ба шумор меравад.

Неругоҳи барқи обии “Себзор” дорои се агрегат буда, иқтидори умумии он 11 мегаваттро ташкил медиҳад. Ба иттилои масъулон неругоҳ дар як сол метавонад беш аз 77 миллион киловат/соат неруи барқи аз лиҳози экологӣ пок истеҳсол намояд. Ин иқдом имкон медиҳад, то 2020 ҳазор нафар ба шабакаи барқ пайваст шаванд, яъне пешрафте, ки ҳам иқтисоди маҳал ва ҳам шароити иҷтимоии аҳолиро беҳтар хоҳад кард.

Президенти Тоҷикистон дар суханронии худ лоиҳаи мазкурро намунаи равшани амалисозии стратегияи рушди иқтисоди сабз арзёбӣ намуд. Сарвари кишвар таъкид намуданд, ки “Себзор” на фақат ба беҳтар шудани таъминот бо неруи барқ мусоидат мекунад, балки имконияти содироти неруи бақр ба кишварҳои ҳамсояро низ фароҳам мекунад.

Корҳои сохтмонӣ, ки соли 2025 бо гузоштани санги асос оғоз ёфт, асосан ба воситаи ширкатҳои маҳаллӣ ва бо истифодаи таҷҳизоти муосир анҷом дода шудаанд. Бар асоси иттилои расмӣ 97% корҳои техникӣ ва муҳандисӣ аз сӯйи мутахассисони тоҷик ирҷо шуда, дар давраи сохтмон то 600 нафар бо ҷойи кор муваққатан таъмин шудаанд. Ҳоло дар неругоҳ 20 нафар мутахассисони маҳаллӣ фаъолияти доимӣ доранд.

Бо фаъол шудани “Себзор” истеҳсоли неруи барқ дар минтақаи Бадахшон то 25% афзоиш меёбад.

Dialog.tj