Вазири маориф ва илми Ҷумҳурии Тоҷикистон Раҳим Саидзода бо директорони муассисаҳои таҳсилоти миёнаи умумӣ ва мудирони муассисаҳои таҳсилоти томактабии шаҳри Кӯлоб вохӯрӣ кард.

Бинобар маълумоти Маркази матбуоти Вазорат, зимни вохӯрӣ масъалаҳои муҳим баррасӣ гардиданд, аз ҷумла зарурати гирифтани таҳсилоти томактабӣ.

“Таҳсилоти томактабӣ заминаи асосии рушди маънавию зеҳнии кӯдаконро ташкил медиҳад ва дар ин самт таваҷҷуҳ бояд бештар гардад”, - таъкид кард вазири маорифи кишвар Раҳим Саидзода.

Раҳим Саидзода вобаста ба талаботи рӯзафзуни ҷомеа ба муассисаҳои таълимӣ раванди сохтмон ва таъмири муассисаҳои таълимиро таҳлил намуда, ба масъулин супориш дод, ки сохтмони иншооти таълимӣ бо назардошти талаботи замони муосир ва босифат ба анҷом расонида шавад.

Инчунин, вазири маорифи кишвар иброз дошт, ки барои баланд бардоштани сатҳи таълим, муассисаҳо бояд бо кабинетҳои фаннӣ, таҷҳизоти ҳозиразамон ва лавозимоти омӯзишӣ таъмин бошанд. Ин омилҳо барои дар амал татбиқ намудани стандартҳои давлатии таҳсилот ва рушди қобилияти хонандагон мусоидат мекунанд.

Dialog.tj