Раҷаб Тайиб Эрдуғон, президенти Туркия дар ҷаласаи 51-уми Шурои вазирони корҳои хориҷии Созмони ҳамкории исломӣ, ки дар шаҳри Истанбул доир гашт, ба сиёсатҳои Исроил ва ҳамлаи ахири ин кишвар ба Эрон вокуниши шадид нишон дод ва ҳушдор дод, ки ҷаҳони Ислом набояд иҷоза диҳад, ки як “Сайк-Пико”-и нав бо хатҳои хунолуд сарнавишти Ховари Миёнаро таъйин кунад.

“Марзҳое, ки бо хун кашида мешаванд, наметавонанд пойдор бошанд” – таъкид кард Эрдуғон.

Президенти Туркия бо ишора ба вазъи фоҷеабори мардуми Ғазза гуфт: “Иҷоза намедиҳем, як тартиботи нави сиёсии шабеҳи Сайк –Пико бо марзҳое, ки бо хун кашида шудаанд, дубора дар минтақаи мо шакл гирад”. Ӯ шароити имрӯзи Ғаззаро “бадтар аз урдугоҳҳои фашистӣ” номида, гуфт, ки ду миллион фаластинӣ 21 моҳ боз дар шароити ғайриинсонии таҳаммулнопазир барои зинда мондан мубориза мебаранд. Президенти Туркия шумори кушташудагони фаластиниро беш аз 55 ҳазор эълон намуд, ки 65 дарсади онҳо занону кӯдаконанд.

“Туркия амиқан дар ғаму андуҳи мардуми Фаластин шарик аст” – афзуд Эрдуғон.

Раҷаб Тайиб Эрдуғон бо ишора ба таҳаввулоти ахир гуфт, ки “ҳич шубҳае нест, ки миллати Эрон бо иттифоқ ва таҷрибаи қавии давлаташон ба шарофати сабру матонат ин рӯзҳои душворро паси сар хоҳад кард”.

Ӯ ҳамлаи Исроил ба Эронро маҳкум карда, гуфт “ҳаққи Эрон барои дифоъ аз худ дар баробари терроризми давлатӣ ҳуқуқест комилан қонунӣ ва машруъ”.

Президенти Туркия Бенямин Нетаняҳуро “монеаи асосӣ дар роҳи сулҳи минтақавӣ” номида, гуфт : “Мо бояд иттиҳоди бештаре нишон диҳем, то на фақат дар Фаластин, балки дар Сурия, Лубнон ва Эрон низ таҷовузҳои Исроилро боз дорем”.

“Сарнавишти Истанбул аз Димишқ, Бағдод, Қоҳира, Санъо, Исломобод, Кобул, Троблус, Теҳрон, Макка, Мадина ва албатта Қудсу Ғазза ҷудо нест. Турк, курд, араб, форс, суннӣ, шиа, алавӣ, африқоӣ, осиёӣ ва ҳатто амрикои лотинӣ, ҳамаи мо як қибла ва як тақдир дорем”- илова намуд Эрдуғон.

Раҷаб Тайиб Эрдуғон Созмони ҳамкории исломиро “дувумин ташкилоти муҳимтарин баъд аз СММ номида, хост ин созмон нақши муассиртар дар ҳалли буҳронҳои минтақа иҷро кунад.

“Ҷаҳони Ислом бояд бо хирад ва иродаи худ ихтилофоти дохилиро ҳал кунад. Мо тавон ва иродаи лозим барои ҳаллу фасли ҳар масъалаеро дорем, ки ба ояндаи мо таъсир мерасонад” – таъкид кард Эрдуғон.

Dialog.tj