Дар як иқдоми рамзӣ Шурои шаҳри Рейм дар шимоли Фаронса яке аз кӯчаҳои минтақаи фарҳангӣ ва илмии “Магазан”-ро ба номи Аҳмадшоҳ Масъуд, Қаҳрамони миллии Афғонистон ва фармондеҳи шинохтаи муқовимат бар зидди терроризм номгузорӣ кард.

Маросими расмии ифтитоҳи кӯча бо ҳузури мақомоти маҳаллӣ ва намояндагони Афғонистон баргузор гардида, тахтаи нави номи кӯча расман аз сӯйи муовини шаҳрдории Реймс Дмитрий Один ба Аҳмад Масъуд, фарзанди фармондеҳи шаҳид супурда шуд.

Дмитрий Один дар суханрониаш ин иқдомро “посухи рӯшан ба торикӣ” арёбӣ карда, гуфт, ки муборизаи Аҳмадшоҳ Масъуд бар зидди ифротгароӣ ва терроризм аз марзҳои Афғонистон фаротар рафта, ба рамзи ҷаҳонии муқовимат табдил шудааст. Ӯ иброз дошт, ки ин номгзорӣ арзиши мубориза бо зулм ва ифротгароиро дар баробари арзишҳои инсонӣ ва демократӣ таҷассум мекунад.

Аҳмад Масъуд, раҳбари Ҷабҳаи муқовимати миллии Афғонистон дар суханронии худ аз ин иқдоми Фаронса истиқбол карда, онро нишонаи “пайванди амиқи миёни миллатҳои Фаронса ва Афғонистон” номид. Ба гуфтаи ӯ, чунин арҷгузорӣ на фақат хотираи як шахсияти таърихиро зинда медорад, балки паёми умед ва талош барои озодӣ, адолат ва муқовиматро зинда мекунад.

Ин бори аввал нест, ки дар Фаронса кӯчае ба номи Аҳмадшоҳ Масъуд гузошта мешавад. Қаблан низ дар яке аз минтақаҳои марказии Париж, дар Шанз Элизе чунин иқдом сурат гифта буд.

Dialog.tj