Тоҷикистон аз ширкати муштараки русӣ-тоҷикии НБО “Сангтӯда 1” (“Сангтудинская ГЭС-1”) 297 миллион доллар қарздор аст ва бар асоси шартномаи нав ин қарзро то соли 2034 марҳила ба марҳила пардохт хоҳад кард. Дар парлумони Тоҷикистон ин масъала баррасӣ шудааст.

Дар ҷаласаи Маҷлиси намояндагон ба Созишномаи ҳамкорӣ миёни Ҳукумати Тоҷикистон ва Ҳукумати Федератсияи Русия дар хусуси истифодаи Неругоҳи барқи обии “Сангтӯда 1”, ки 30-уми июли соли 2009 имзо шуда буд, тағйирот ворид ва қабул карда шуд. Мақсади протокол устувор кардани вазъи молиявии шаркати “Барқи тоҷик” арзёбӣ мешавад.

Тибқи созишномаи нав, ҳаҷми умумии саҳмияҳои тарафҳо дар лоиҳа 847 миллион доллар мушаххас шуд. Муҳлати баргардонидани сармоягузориҳо аз 20 сол то ба 35 сол, яъне то соли 2048 тамдид карда мешавад. Ҳамзамон, аз соли 2025 истифодаи тарифҳои имтиёзноки нерӯи барқ оғоз мешавад, ки сатҳи он дар соли аввал 1,5 сент ва то соли 2032 ба 2,2 сент хоҳад расид.

Ин тағйирот имкон медиҳад, ки миқдори қарзҳои ҷамъшуда баробар ба 3, 257 миллиард сомонӣ то соли 2034 пурра ҳисоб шаванд ва ҳамзамон тарифи хариди неруи барқ камтар аз сатҳи имрӯза нигоҳ дошта шавад. Аз соли 2033 то соли 2048 тариф дар сатҳи 3,3 сент устувор боқӣ мемонад.

Таҳлили молиявӣ самаранок будани созишномаро барои давраи 2025-2049 баробар ба 588 миллион доллар пешбинӣ мекунанд.

Ин иқдом дар соҳаи энергетикаи Тоҷикистон ба беҳтар шудани вазъи молиявӣ ва таъмини устувори таъминоти барқ дар кишвар мусоидат менамояд.

Dialog.tj