Раёсати Вазорати корҳои дохилӣ дар шаҳри Душанбе боз аз дастгиру ҷаримабандии фаъоли шабакаҳои иҷтимоӣ хабар дод, ки пайваста бо алфози қабеҳ ва либосҳои нимурён дар интернет намоён мешуд.

Мақомоти интизомӣ дар пойтахт Пирумшозода Меҳрона, ки дар шабакаҳои иҷтимоӣ бо номи Ҷонона маъруф аст, бо ҷурми мунтазам дар шабакаҳои иҷтимоӣ наворҳои ғайриахлоқӣ нашр кардан, дастгир кард.

Раёсати ВКД дар шаҳри Душанбе мегӯяд, ки агарчи номбурда қаблан барои такрор накардани гуфтору кирдораш дар шабакаҳои иҷтимоӣ расман огоҳонида шуда буд, вале ислоҳ нашуд.

Вобаста ба ин, аз ҷониби кормандони Шуъбаи огоҳонӣ ва пешгирии ҳуқуқвайронкунӣ байни ноболиғон ва ҷавонони Раёсати ВКД дар шаҳри Душанбе протоколи ҳуқуқвайронкунии маъмурӣ тартиб дода шуда, ҷиҳати чораҷӯӣ ба Суд ирсол гардида, аз ҷониби Суд нисбат ба Пирумшозода Меҳрона ҷаримаи маъмурӣ таъин карда шуда, ҷиҳати минбаъд ба чунин ҳуқуқвайронкуниҳо даст назадан қатъиян огоҳонида шуд.

Ёдовар мешавем, ки Пирумшозода Меҳрона бо тахаллуси Ҷонона пайваста дар шабакаҳои иҷтимоӣ аксу наворҳои ғайриахлоқӣ нашр карда, бо ин роҳ мехоҳад диққати мардумро зиёдтар ҷалб намояд. Ҳатто дар шабакаҳои Тик-Ток ва Инстаграм чандин саҳифаҳое ҳастанд, ки бо номи ӯ фаъоланд ва аксу наворашро нашр мекунанд.

Dialog.tj