Ҳукумати Доналд Трамп тасмим гирифтааст, ки ворид шудани шаҳрвандони 36 кишвар, аз ҷумла кишварҳои Осиёи Марказӣ ба Иёлоти Муттаҳидаи Амрикоро манъ кунад. Дар ин бора расонаҳои амрикоӣ хабар дода, навиштаанд, ки Вазорати корҳои хориҷии Амрико шеваи иҷрои қарори Трампро таҳия мекунад.

Тибқи иттилоъ, ба рӯйхати нави манъи додани раводид ва сафар ба Амрико баъзе кишварҳои муттаҳиди он, аз ҷумла Миср, Ҷибути, кишварҳои ғарби Осиё, Осиёи Марказӣ ва Уқёнуси Ором шомил мешаванд.

Ин қарори нав ба воситаи Марко Рубио, Вазири корҳои хориҷии Иёлоти Муттаҳидаи Амрико имзо шудааст. Вазорати корҳои хориҷии Амрико бо имзои ин қарор ба дипломатҳои кишварҳои зикршуда иттилоъ додааст, 60 рӯз вақт доранд, то меъёрҳо ва шартҳои пешниҳодшударо иҷро кунанд.

Кишварҳое, ки дар ин рӯйхат қарор доранд, инҳоянд: Ангола, Антигуа ва Барбуда, Бенин, Бутан, Буркина –Фасо, Кабо-Верде, Камбоҷа, Камерун, Ҷумҳурии демократии Конго, Ҷибути, Доминика, Эфиопия, Миср, Габон, Гамбия, Гана, Соҳили Марҷон (Кот-д Ивуар), Қирғизистон, Либерия, Малави, Мавритания, Нигер, Нигерия, Сент-Китс ва Невис, Сент-Лусия, Сан-Томе Принсипи, Сенегал, Судони Ҷанубӣ, Сурия, Танзания, Тонга, Тувалу, Уганда, Вануату, Замбия ва Зимбабве мебошанд.

Амрико қаблан ворид шудани шаҳрвандони Афғонистон, Маянмар, Чад, Ҷумҳурии Конго, Гвенияи Экватори, Эритрия, Ҳаити, Эрон, Либия, Сомали, Судон ва Яман ба Амрикоро пурра манъ карда буд. Ҳамчунин, воридшавии мусофирон аз кишварҳои Бурунди, Куба, Лаос, Сиерра-Леоне, Того, Туркманистон ва Венесуэла ба хоки Амрико маҳдуд  шуда буд.

Dialog.tj