Вазорати рушди рақамӣ, инноватсия ва саноати аэрокосмоси Қазоқистон рӯзи 12-уми июни соли ҷорӣ бо ширкати Starlink, ки зери мудирияти ширкати SpaceX –и Илон Маск аст, шартномаи ҳамкорӣ имзо кард. Тибқи ин шартнома фурӯши расмии терминалҳои интернетии спутникӣ дар Қазоқистон дар нимаи сеюми соли 2025 оғоз мешавад. Минбаъд шаҳрвандон метавонанд ин терминалҳоро ба шакли қонунӣ харидорӣ намуда, истифода баранд.

Жаслан Мадиев, вазири рушди рақамӣ, инноватсия ва саноати аэрокосмоси Қазоқистон гуфт, то ҳол Starlink дар кишвараш фақат дар ҳолати озмоишӣ ва асосан ба мактабҳо интернет медод ва барои мардум дастрас набуд. Аммо ҳоло ширкат ба ҳамаи талаботи қонунгузории Қазоқистон дар соҳаи амнияти иттилоот ва алоқа розӣ шудааст ва дар ҳамин сол ҳамаи чораҳои заруриро анҷом медиҳад, то мардум расман ба интернети спутникӣ дастрасӣ пайдо кунанд.

Вазорат умед дорад, ки бо пайвастшавӣ ба Starlink мактабҳои деҳот, муассисаҳои тиббӣ ва истифодабарандагони интернет аз тариқи дастгоҳҳои мобилӣ ва дигар инфрасохтор дар минтақаҳое, ки ба насби хатҳои оптикӣ мушкил аст, дастрасии босифат ба интернет пайдо мекунанд.

Dialog.tj