Ҳайати Ҷумҳурии Тоҷикистон дар нишасти дуюми вазирони илм, технология ва инноватсия, ки дар доираи ташаббусҳои ҷаҳонии “Як камарбанд, як роҳ” рӯзи 11-уми июн ифтитоҳ шуд, ширкат доранд. Дар ин бора Вазорати илм ва маорифи Ҷумҳурии Тоҷикистон хабар додааст.

Ин нишаст 11-уми июн дар шаҳри Чэндуи Ҷумҳурии Мардумии Чин ифтитоҳ гардид ва дар он намояндагони вазорату идораҳои марбутаи кишварҳои минтақа, ҳамчунин, намояндагони созмонҳои байналмилалӣ ва сохторҳои илмӣ ширкат доранд.

Нишасти мазкур яке аз сарчашмаҳои муҳимми байналмилалӣ барои густариши ҳамкориҳои илмӣ ва техникӣ дар миёни кишварҳо арзёбӣ мегардад. Ҳадафи асоси он густариши робитаҳои шарикӣ дар самтҳои афзалиятноки илм ва инноватсия, рушди лоиҳаҳои муштараки таҳқиқотӣ ва мубодилаи дастовардаҳои пешрафта дар бахши технологияҳои муосир мебошад.

Ширкати ҳайати Тоҷикистон дар ин нишаст ҳамчун қадами устувор дар амалӣ намудани сиёсати хориҷии кишвар арзёбӣ мешавад, ки ба ҳамгироӣ дар равандҳои байналмилалии илмӣ ва таълимӣ ва таҳкими мавқеи Тоҷикистон дар муколамаҳои илмии минтақавӣ ва ҷаҳонӣ равона шудааст.

Dialog.tj