Бинобар иттилои Муассисаи давлатии «Тоҷикфилм» аз 15-ум то 20-уми октябри соли равон дуюмин Синамоҷашнвораи байналмилалии Душанбе — «Тоҷи Сомон» доир мегардад.

Гуфта мешавад, ки синамоҷашнвораи мазкур бахшида ба Рӯзи кинои тоҷик (16-уми октябр) бо шиори «Таърихи рушди тоҷикон» баргузор мешавад.

Иттилоъ дода мешавад, ки дар «Тоҷи Сомон»-и имсола рӯзҳои кинои Русия, Эрон, Ҳиндустон, Қирғизистон ва Туркманистон доир гашта, дар умум меҳмони зиёд аз кишварҳои Иттиҳоди Давлатҳои Мустақил, Осиё ва Аврупо иштирок менамоянд.

Тибқи маълумоти мавҷуда, дар доираи дуюмин Синамоҷашнвораи байналмилалии Душанбе — «Тоҷи Сомон» ҷаласаи Шурои директорони киностудияҳо, рӯнамоии лоиҳаҳои синамоӣ-филмҳои тасвирӣ, ҳунарӣ ва мустанад, ҳамоиш бо иштироки намояндагони маъруфи кинои давлатҳои хориҷи дуру наздик, нишастҳои матбуотӣ, дарси «Устод ва шогирд» ба нақша гирифта шудааст.

Ёдовар мешавем, ки Синамоҷашнвораи байналмилалии Душанбе — «Тоҷи Сомон» дар ду сол як маротиба бо мақсади дастгирии ҷавонони эҷодкор, табодули таҷриба, таҳияи лоиҳаҳои муштарак, таҳкиму тавсеаи робитаҳои байналмилалӣ дар соҳаи кино баргузор мешавад.

Dialog.tj