Бинобар иттилои маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар Маркази миллии тиббии Тоҷикистон “Шифобахш” аз ҷониби табибони тоҷик дар ҳамкорӣ бо мутахассисон аз Ҷумҳурии Исломии Эрон дар самти табобати бемориҳои рагҳои мағзи сар боз як амалиёти душвори ҷарроҳӣ бомуваффақият ба анҷом расонида шуд.

Гуфта мешавад, ки ҷарроҳии мазкурро Субҳониддин Баҳодуров, табиби ҷарроҳи бемориҳои мағзи сари “Шифобахш” бо ҳамкасбонаш аз  Ҷумҳурии Исломии Эрон гузаронидааст.

Иттилоъ дода мешавад, ки амалиёти ҷарроҳӣ ба марди 66-сола, ки бо ташхиси аневризмаи артерияи хоби даруна сегменти кавернозӣ дар муассисаи мазкур бистарӣ гардида буд, бо усули эндовескулярӣ стентгузорӣ анҷом дода шуд.

Тибқи гуфтаи Субҳониддин Баҳодуров аневризмаи сегменти каверозии артерияи хоби даруна дар бемор аломатҳои дардҳои шадид дар қисми чашм ва рӯй ба вуҷуд меорад. Агар ин аневризм бикафад, дар бемор ташхиси каверози саустия иваз мешавад, ки бемор дарди чашм, нобиноӣ, сурхшавӣ ва берун баромадани чашмро эҳсос мекунад.

Ҳамчунин, иттилоъ дода мешавад, ки ҳолати бемор пас аз амалиёти ҷарроҳӣ хуб мебошад.

Dialog.tj