Чандест, ки дар шабакаҳои иҷтимоӣ, хусусан Инстаграм навори кӯтоҳе чарх мезанад, ки як фаъоли ин шабака бо номи Фаррух Алимов дар миёни мардум бо алфози қабеҳ касеро дашному таҳдиди задан мекунад. Дар ин росто, Раёсати Вазорати корҳои дохилӣ дар шаҳри Душанбе аз боздошти ӯ ва гумонбари дигар хабар дод.

Гуфта мешавад, ки ҳамчун гумонбар дар содир намудани ҷинояти авбошӣ ва дағалона вайрон намудани тартиботи ҷамъиятӣ, кормандони ШВКД-2 дар ноҳияи Сино Алимов Фаррух ва Ҳалимов Акбарро дастгир намуданд.

Зикр мегардад, ки онҳо 21-уми майи соли ҷорӣ, дар боғи «Умари Хайём» бо ҳамдигар муноқиша намуда, якдигарро мавриди латукӯб қарор додаанд. Ҳамзамон ба эроди шаҳрвандон беэътиноӣ намуда, бо садои баланду алфози қабеҳ оромии шаҳрвандонро халалдор сохтаанд.

Ба навиштаи РВКД дар шаҳри Душанбе нисбат ба ҳар ду бо моддаи 237 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шудааст.

Ёдовар мешавем, бори аввал нест, ки мақомоти интизомӣ фаъоли шабакаҳои иҷтимоӣ Алимов Фаррухро дастгир мекунанд, балки пеш аз ин чанд маротиба барои дағалгуфторӣ дар интернет ба ӯ ҷазои маъмурӣ роҳандозӣ карда шуда буд.

Dialog.tj