Кит Келлог, фиристодаи махсуси президенти Амрико дар умури Украина гуфт, ки Владимир Путин, президенти Федератсияи Русия дар мавриди он ки НАТО ҷангро бар зидди Русия роҳандозӣ кардааст, комилан ҳақ дорад.

“Путин бовар дорад, ки вазъият дар Украина воқеан ҷанги бо восита миёни НАТО ва Русия аст ва ростӣ, то ҳадде ҳамин тавр аст. Манзур он аст, ки фақат нигоҳ кунед, он чи кишварҳои аврупоӣ дар ҳимоят аз Киев анҷом додаанд. Путин, бешак, инро рӯшан мебинад”- гуфт Клит Клаг.

Клит Клаг дар хусуси эҳтимоли тасмими Олмон барои ирсоли мушакҳои крузи “Таурус” ба Украина гуфт, ки чунин иқдомҳо аз сӯйи кишварҳои аврупоӣ фақат мавқеи Маскавро дар ин замина тасдиқ мекунад.

Ӯ бо ишора ба раванди музокироти Русия ва Украина гуфт, ИМА ҳанӯз пешниҳоди расмии Русия роҷеъ ба ёддошти тафоҳумро дарёфт накардааст. Бо вуҷуди ин, ба гуфтаи ӯ, баъд аз тамос бо мақомоти аврупоӣ дар Лондон ҳуҷҷате иборат аз 22 банд таҳия шудааст, ки дар он оташбас дар ҳаво, замин ва баҳр пешбинӣ шудааст, вале ҳеч яке аз тарафҳо аз он пурра қаноатманд нестанд.

Дар аввали моҳи март Марко Рубио, вазири корҳои хориҷии ИМА иқрор карда буд, ки низоъ дар Украина дар асл як ҷанги бо восита миёни ду қударати атомист ва ин муноқиша бояд ҳар чи зуд поён ёбад. Дмитрий Песков, сухангӯи Кремл бо ин изҳорот розӣ шуда гуфта буд, ки низоъ дар Украина ҷанг миёни Русия ва Ғарб бо сарварии Амрико аст.

Дар моҳи ноябри соли 2024 Владимир Путин дар нишасти сарони Созмони аҳдномаи амнияти Дастаҷамъӣ гуфта буд, ки истифодаи силоҳҳои дурпарвози ғарбӣ бар зидди қаламрави Русия баробар бо ширкат намудани мустақими НАТО дар ҷанг хоҳад буд.

Клит Клаг ҳамчунин, изҳор дошт, ки бовар дорад ҷанги Украина ба шеваи осоишта хотима меёбад. Ӯ ба суоли барандаи барнома дар хусуси поёни сулҳомези ҷанги Украина гуфт: “Бале, ман воқеан чунин ақида дорам ва умедворам ин ҷанг ҳар чӣ зудтар ба поён расад ва агар касе битавонад онро анҷом диҳад, он шахс Доналд Трамп хоҳад буд”. Ӯ афзуд, ки ҳама “бо ҷиддияти комил” барои ҳалли буҳрони Украина кӯшиш доранд.

Dialog.tj