Масъуд Пизишкиён, президенти Ҷумҳурии Исломии Эрон дар шаҳри Масқати Умон зимни мулоқот бо эрониёни муқими ин кишвар гуфт, ки дар кишварамон тағйирот ба вуҷуд хоҳем овард ва навобаста аз будан ё набудани таҳримҳо “бо ваҳдату ҳамдилӣ ва дурӣ аз ихтилофу ҷудоӣ Эронро хоҳем сохт”.

Президенти Эрон дар ин суҳбат таъкид кард, ки бояд аз зулму беадолатӣ битарасем ва бар асоси адолату инсоф бо ҳамсоягон ва ҷаҳониён рафтор кунем: “Дар ҳар ҷомеае теъдоди ками одамон ҳастанд, ки ҳарчи кунем, имон намеоранд. Гурӯҳе низ нухбаҳо ва шахсиятҳои барҷастаанд...”

Масъуд Пизишкиён бо ишора ба таҳримҳо таъкид кард, ки агар кишварҳои исломӣ бо ҳам муттаҳид шаванд, робитаҳои иқтисодӣ, сармоягузорӣ ва саноатиро бо шуур густариш диҳанд, дигар ниёз ба касе нахоҳад монд.

“Эътиқод бо тавоноӣ сабаби муваффақият мешавад. Ба минтақаи мо меоянд нафту газ ва манобеи моро мебаранд, вале ба ҷояш силоҳ, бомба ва мушак медиҳанд. Моро аз якдигар метарсонанд ва душманон бо тавтеа ва найранг моро барои ҳамдигар хатарнок месозанд” - гуфт Масъуд Пизишкиён.

Президенти Ҷумҳурии Исломии Эрон афзуд, мо барои якдигар таҳдид не, балки имконияте барои рушдем ва бояд аз ин фурсат дуруст истифода карда, бо ҳамдилӣ вазъияти кунуниро тағйир бидиҳем.

“Ман ирода ва азми қатъиро дар подшоҳии Умон мебинам. Ин ирода таърихи тӯлонӣ дорад ва мутмаинам, ки бо ҳамдигар метавонем тағйир ворид намоем” – гуфт Масъуд Пизишкиён.

Ӯ дар интиҳои суханрониаш бо ишора ба ин ки мусалмононро барои ҷанг бо якдигар водор кардаанд, афзуд: “Бояд бипурсем, ки шаётини ҷаҳон аз мо чӣ мехоҳанд. Бояд найрангҳоро канор гузорем ва дар ҷомеа ростӣ, самимият ва танудурустиро ривоҷ диҳем. Мо метавонем бо кумаки якдигар сулҳ, амният, оромиш ва суботро барқарор кунем ва ин корро хоҳем кард”.

Dialog.tj