Сергей Миронов, раиси ҳизби “Русияи одил барои ҳақиқат” ба сарвазири Федератсияи Русия Михаил Мишустин пешниҳод кард, ки дар  Русия низоми санҷиши рейтинги аҳволи иҷтимоии муҳоҷирон ҷорӣ карда шавад. Дар ин бора хабаргузории “РИА Новости” хабар медиҳад.

“Пешниҳод мешавад, ки масъалаи таъсиси низоми рейтинги иҷтимоӣ дар Федератсияи Русия мавриди баррасӣ қарор гирад ва нисбати шаҳрвандоне, ки дар қаламрави ин кашвар муваққатан ё доимӣ иқомат доранд, татбиқ шавад” – зикр шудааст дар пешниҳоди Сергей Миронов.

Бар асоси иттилоъ, пешниҳоди гузаронидани рейтини аҳволи иҷтимоии муҳоҷирон бо чанд меъёр анҷом дода мешавад. Меъёрҳои риояи қонунгузории муҳоҷират, надоштани доғи судӣ, қонуншиканиҳои маъмурӣ, доштани ҷойи кори расмӣ, пардохти андозҳо, ширкат дар барномаҳои давлатии мутобиқсозӣ ва ҳамгироӣ, инчунин, донистани забони русӣ ва қонунҳои Русия муайянкунандаи рейтинги аҳволи иҷтимоии муҳоҷирон хоҳад буд.

Тибқи ин пешниҳод, дар ҳолати вайрон кардани мунтазами меъёрҳои рейтинги иҷтимоӣ механизми ихроҷи маъмурӣ аз қаламрави Русия нисбати чунин ашхос татбиқ мешавад ва барои онҳо депорти умрбод аз ин кишвар таъйин карда мешавад.

Сергей Миронов дар суҳбат ба “РИА Новости” гуфтааст, ки рейтинги эътимоднокии иҷтимоӣ бояд саҳми шахсии шаҳрвандони хориҷиро дар рушди иқтисод арзёбӣ кунад ва ҳамчунин, нишон диҳад, ки то чӣ андоза онҳо ба пайвастани сарнавишти худ бо Русия омодагӣ ва ангеза доранд.

“Ҷорӣ кардани рейтинги эътимоднокӣ имкон медиҳад, ки бисёр масъалаҳои сиёсати муҳоҷиратӣ ҳал шаванд. Муҳим он аст, шахсе, ки бо виҷдон қонунҳо, меъёрҳо ва қоидаҳои Русияро риоя мекунад, метавонад имтиёзҳо гирад. Аммо имкониятҳои он муҳоҷироне, ки намехоҳанд ин талаботро иҷро кунанд, маҳдуд хоҳанд шуд”- гуфтааст Сергей Миронов.

Сергей Мирнов аз ҷумлаи сиёсатмадорон ва вакилони Думаи давлатии Русия аст, ки нисбат ба ҳузури муҳоҷирони меҳнатӣ дар Русия доиман изҳори нигаронӣ намуда, ташаббусҳои аҷибу ғарибро барои рондани онҳо аз хоки Русия пешниҳод мекунад. Чанде қабл ӯ пешниҳод кард, ки додани шаҳрвандии Русия ба муҳоҷирони меҳнатӣ манъ карда шавад.

Dialog.tj